सोयगाव, 27 ऑगस्ट : सोयगाव तालुक्यातून धक्कादायक बातमी समोर आली आहे. सोयगाव तालुक्यातील बनोटी येथून जवळ असलेल्या वाडीसुतांडा गावापासून पाच कि.मी.अंतरावर धारकुंड धारेश्वर महादेवाचे तिर्थ क्षेत्र आहे. याठिकाणी असलेल्या धारेश्वर धबधब्याखाली पाय घसरून पडल्याने तरूणाचा मृत्यू झाला आहे. गजानन राघू माने (वय 35 रा. केऱ्हाळा ता. सिल्लोड) असे या मृत तरूणाचे नाव आहे.
काय आहे संपुर्ण बातमी? –
मिळालेल्या माहितीनुसार, सोयगाव तालुक्यातील बनोटी येथून जवळ असलेल्या वाडीसुतांडा गावापासून पाच कि.मी.अंतरावर धारकुंड धारेश्वर महादेवाचे तिर्थ क्षेत्र आहे. येथे श्रावण महिन्यात भाविकांची मोठ्या प्रमाणावर गर्दी होत असते. सिल्लोड तालुक्यातील केऱ्हाळे येथील गजानन माने हा तरूण आपल्या चार ते पाच मित्रांसह धारकुंड येथे महादेवाचे दर्शन घेण्यासाठी आले होते. दरम्यान, तीनशे फुटावरून कोसळणाऱ्या धारेश्वर धबधब्याखाली गजानन याचा पाय घसरला त्यानंतर तो तेथील मोठ्या कुंडामध्ये जावून अडकला.
धारेश्वर धबधब्याखाली तरूणाचा मृत्यू –
दरम्यान, बनोटी पोलीस चौकीत खबर दिल्यावरुन उपनिरीक्षक रज्जाक शेख जमादार संदीप सुसर, राजेंद्र बर्डे, विकास दुबेले घटनास्थळी पोहोचले. तेथे काही आलेले पर्यटकांनी कुंडात उतरुन सायंकाळी पाच वाजता गजानन मानेचा मृतदेह पाण्याबाहेर काढला. त्याच्या पश्चात पत्नी, एक मुलगा, एक मुलगी, आई, वडील, एक भाऊ असा परिवार आहे.
प्रशासन दखल घेणार का? –
धारेश्वर येथील श्रावण महीन्यात दर वर्षी तीन ते चार व्यक्तींचा मृत्यू होत असल्याच्या घटना घडलेल्या आहेत. या वर्षी पहिल्याच श्रावण सोमवारी जळगाव येथील गौरव किसन नेरकर या तरूणाचा मृत्यू झाला होता. गेल्या अनेक दिवसापासुन येथील कुंडास जाळी किंवा कंपाउंड बसविण्याची मागणी ग्रामस्थांकडून होत असताना अद्याप प्रशासनाने दखल घेतली नाही. या पार्श्वभूमीवर प्रशासनाने दखल घेऊन कुंडास जाळी किंवा कंपाउंड बसविण्यात यावे, अशी मागणी केली जात आहे.
हेही वाचा : पावसाचा जोर वाढला, गिरणा धरण 74 टक्के भरले, विसर्ग सुरु; पालकमंत्री गुलाबराव पाटील यांनी केले महत्वाचे आवाहन
