नवी दिल्ली, 17 सप्टेंबर : दिल्लीचे मुख्यमंत्री तथा आम आदमी पार्टीचे प्रमुख अरविंद केजरीवाल यांना कथित मद्य घोटाळा प्रकरणात सर्वोच्च न्यायालयाने नुकताच जामीन मंजूर केला. यानंतर अरविंद केजरीवाल यांनी मुख्यमंत्रीपदाचा राजीनामा देणार असल्याची घोषणा केली. अरविंद केजरीवाल हे त्यांच्या पत्नीला दिल्लीच्या मुख्यमंत्रीपदावर बसवणार आहेत, असा आरोप भाजप नेत्यांकडून केला जात होता. दरम्यान, आज अरविंद केजरीवाल यांनी त्यांच्या पक्षातील महिला नेत्या आणि मंत्रिमंडळातील सहकारी आतिशी यांच्या नावाचा प्रस्ताव दिल्लीच्या सभागृहात ठेवला आहे.
मंत्री आतिशी यांचा मुख्यमंत्रीपदासाठी प्रस्ताव –
अरविंद केजरीवाल यांनी मुख्यमंत्रीपदाच्या राजीनाम्याची घोषणा केल्यानंतर दिल्लीच्या मुख्यमंत्रीपदी कोणाची वर्णी लागणार याची चर्चा गेल्या दोन दिवसांपासून सुरू होते. मात्र, अरविंद केजरीवाल यांनी आपल्या पक्षातील महिला नेत्या आणि मंत्रिमंडळातील सहकारी आतिशी यांच्या नावाचा प्रस्ताव दिल्लीच्या सभागृहात ठेवला आहे. मंत्री आतिशी ह्याच दिल्लीच्या मुख्यमंत्री होणार असल्याचे आता स्पष्ट झाले आहे.
महिला म्हणून दिल्लीच्या मुख्यमंत्रीपदावर 10 वर्षांनंतर होणार विराजमान –
काँग्रेसच्या तत्कालीन नेत्या शिला दीक्षित ह्या 10 वर्षांपूर्वी दिल्लीच्या मुख्यमंत्री पदावर विराजमान होत्या. मात्र, अण्णा आंदोलनानंतर दिल्लीत मोठा राजकीय बदल झाला आणि दिल्लीचे सुत्रे नव्याने स्थापन झालेल्या आम आदमी पक्षाच्याहाती गेली. त्यानंतर अरविंद केजरीवाल हे दिल्लीचे मुख्यमंत्री बनले. दरम्यान, अरविंद केजरीवाल यांनी मंत्री आतिशी यांची दिल्लीच्या मुख्यमंत्रीपदासाठी प्रस्ताव ठेवल्यानंतर शीला दीक्षित यांच्यानंतर पुन्हा एकदा दिल्लीला महिला मुख्यमंत्री मिळणार आहेत.
