सुनिल माळी, प्रतिनिधी
पारोळा, 20 सप्टेंबर : जळगाव जिल्ह्यात लाचखोरीच्या घटना ताज्या असताना पारोळा तालुक्यातून लाचखोरीचे प्रकरण समोर आले आहे. पारोळा तालुक्यातील धुळ पिंप्री गावातील मंजूर झालेल्या काँक्रीट व पेव्हर ब्लॉकच्या कामाची वर्क ऑर्डर काढण्याच्या मोबदल्यात 1 लाख रूपयांची लाच घेणाऱ्या पारोळा पंचायत समिती कार्यालयातील ग्रामविस्तार अधिकारीसह कंत्राटी सेवकाला जळगाव लाचलुचपत विभागाने रंगेहाथ पकडले आहे.
नेमकं काय घडलं? –
मिळालेल्या माहितीनुसार, धुळपिंप्री गावात महात्मा गांधी रोजगार हमी योजनेअंतर्गत 60 लाख रुपये किंमतीची चार विकासकामे मंजूर करण्यात आली होती. यामध्ये काँक्रीटीकरण व पेव्हर ब्लॉक बसविणे या कामांचा समावेश होता. दरम्यान, या कामांची वर्क ऑर्डर काढण्यासाठी पारोळा पंचायत समिती कार्यालयातील ग्रामविकास अधिकारी सुनील अमृत पाटील (वय 58) आणि कंत्राटी सेवक कल्पेश ज्ञानेश्वर बेलदार (वय 28) यांनी एक लाख 80 हजार रुपयांच्या लाचेची मागणी केली होती.
लाचेची केली मागणी –
याप्रकरणात कंत्राटी सेवक बेलदार याने स्वतःसाठी एक टक्का तर ग्रामविस्तार अधिकारी पाटील यांच्यासाठी दोन टक्के लाच मागितली होती. दरम्यान, लाचेची मागणी केल्यानंतर धुळपिंप्री गावातील सरपंचांच्या मुलाने या लाचमागणीची तक्रार जळगाव लाचलुचपत प्रतिबंधक विभागाकडे केली होती. त्यानंतर लाचलुचपत विभागाने तक्रारीची पडताळणी करून सापळा रचला.
लाचलुचपत विभागाने पकडले रंगेहाथ –
जळगाव लाचलुचपत विभागाने आज 20 सप्टेंबर रोजी पारोळा पंचायत समिती कार्यालयात सापळा लावला. तडजोडीअंती 1 लाख रुपयांची रक्कम ठरली. दरम्यान, कंत्राटी सेवक कल्पेश बेलदार याने पंचासमोर एक लाख रुपये स्वीकारताना लाचलुचपत विभागाने त्याला रंगेहाथ पकडले. त्याच्याबरोबर ग्रामविस्तार अधिकारी सुनील पाटील यांनाही अटक करण्यात आली. याप्रकरणी पारोळा पोलीस ठाण्यात गुन्हा दाखल करण्यात आला आहे. दरम्यान, लाचलुचपत प्रतिबंधक विभागाने केलेल्या या कारवाईमुळे पारोळा तालुक्यातील पंचायत समिती कार्यालयात मोठी खळबळ उडाली आहे.
यांनी केली कारवाई –
या कारवाईचे नेतृत्व जळगाव लाचलुचपत प्रतिबंधक विभागाचे पोलीस उपअधीक्षक योगेश ठाकूर यांनी केले. त्यांच्या पथकात पोहेकॉ. सुनिल वानखेडे, पोना. किशोर महाजन, पोना. बाळू मराठे यांचा समावेश होता. त्याचप्रमाणे पोलीस निरीक्षक नैत्रा जाधव, स्मिता नवघरे, पोहेकॉ. सुरेश पाटील, रविंद्र घुगे, म.पो.हे.कॉ. शैला धनगर, प्रदीप पोळ, प्रणेश ठाकुर, सचिन चाटे यांनी या कारवाईत महत्त्वाची भूमिका बजावली.
हेही पाहा : Yogendra Puranik Interview : जपानमधील मराठमोळे आमदार योगेंद्र पुराणिक यांची विशेष मुलाखत
