छत्रपती संभाजीनगर, 25 फेब्रुवारी : मागील काही दिवसांपासून आशा स्वयंसेविकांकडून त्यांच्या प्रलंबित मागण्यासाठी राज्यभरात संप करण्यात येत आहे. दरम्यान, वारंवार विनंती करूनही संपावरील आशा स्वयंसेविका कामावर रुजू झाल्या नसल्याने छत्रपती संभाजीनगर महानगरपालिकेचे आयुक्त जी. श्रीकांत यांनी 450 आशा स्वयंसेविकांना निलंबित केले होते.
आशा स्वयंसेविकांच्या निलंबनावर प्रशासन ठाम –
यानंतर आशा स्वयंसेविका शनिवारी माफीनाम्यासह प्रशासक जी. श्रीकांत यांची भेट घेऊन कामावर हजर राहण्याची तयारी दर्शवली आहे. दरम्यान, आयुक्तांनी माफीनामा अमान्य करीत नवीन भरती प्रक्रिया सुरू करण्याचा इशारा दिला असून संपावर गेलेल्या 450 आशा स्वयंसेविकांच्या निलंबनावर ठाम असल्याची भूमिका घेतली आहे.
आशा स्वयंसेवी संघटनेने मानधन वाढीसह आपल्या प्रलंबित विविध मागण्यांसाठी राज्यव्यापी संपाची हाक दिली होती. छत्रपती संभाजीनगर जिल्ह्यातील आशास्वयंसेविकादेखील या संपात सहभागी झाल्याचे समोर आले होते. याच संपात छत्रपती संभाजीनगर महापालिकेत कार्यरत असलेल्या 511 आशा स्वयंसेविका सहभागी झाल्या होत्या.
दरम्यान, आशा स्वयंसेविकांच्या संपाचे परिणाम आरोग्य विभागावर होताना पाहायला मिळत असून, आशा सेविकांनी तात्काळ कामावर हजर राहण्याबाबत दोन वेळेस आरोग्य वैद्यकीय अधिकाऱ्यांनी नोटिसा बजावल्या होत्या. मात्र, आपल्या मागण्यांवर ठाम असलेल्या अशा सेविकांनी या नोटीसची कोणतेही दखल घेतली नव्हती, त्यामुळे मनपा आयुक्त जी. श्रीकांत यांनी 450 आशा स्वयंसेविकांना निलंबित करण्याचे आदेश दिले होते.
