मुंबई, 24 ऑगस्ट : बदलपूर मुलींवर झालेल्या अत्याचाराविरोधात महाविकास आघाडीकडून आज महाराष्ट्र बंदची हाक देण्यात आली होती. मात्र, महाविकास आघाडीच्या या महाराष्ट्र बंदच्या हाकविरोधात हायकोर्टात याचिका दाखल करण्यात आली. या पार्श्वभूमीवर राज्यात अशापद्धतीने बंद पुकारणे हे अवैध असल्याचे हायकोर्टाने सांगितले. दरम्यान, महाविकास आघाडीने हा बंद मागे घेत आज राज्यात निषेध आंदोलन करण्यात येणार असल्याचे म्हटलंय.
मविआकडून आज राज्यभर निषेध आंदोलन –
बदलापूर येथे अत्याचाराचे प्रकरण घडले आणि त्यानंतर महाविकास आघाडीने महाराष्ट्र बंदची घोषणा केली होती. मात्र, शुक्रवारी कोर्टाने हा बंद बेकायदेशीर ठरवला आणि त्यामुळे महाविकास आघाडीने बंद मागे घेत ठीक ठिकाणी राज्यभरात आज आंदोलन करण्याचा निर्णय घेतला. या पार्श्वभूमीवर राज्यातील प्रत्येक जिल्ह्यात महाविकास आघाडीचे नेते-पदाधिकारी यांच्याकडून निषेध आंदोलन केले जाणार आहे.
पुण्यात शरद पवारांच्या उपस्थितीत निषेध आंदोलन –
बदलापूर येथील घटनेच्या निषेधार्थ महाविकास आघाडी व घटक पक्षांच्यावतीने आज काढण्यात येणारा बंद रद्द करण्यात आला आहे. मात्र, बदलापूरच्या घटनेच्या निषेधार्थ आंदोलन केले जाणार आहे. यासाठी पुण्यात शरद पवार यांच्या नेतृत्त्वात आंदोलन, काळ्या फिती बांधून सरकारविरोधात घोषणाबाजी देण्यात येत आहे. पुण्यात खासदार शरद पवार यांच्या नेतृत्त्वात हे निषेध आंदोलन होत आहे. आंदोलनाच्या स्थळी शरद पावर पोहोचले असून त्यांच्यासोबत खासदार सुप्रिया सुळे, राष्ट्रवादीचे कार्यकर्ते तसेच काँग्रेस आणि राष्ट्रवादीचे कार्यकर्ते उपस्थित आहेत.
मुंबई उच्च न्यायालयाच्या निर्णयानंतर शरद पवार काय म्हणाले? –
मुंबई उच्च न्यायालयाच्या निर्णयावर जेष्ठ नेते शरद पवार म्हणाले की, बदलापूर घटनेच्या पार्श्वभूमीवर उद्या दि. २४ ऑगस्ट २०२४ रोजी राज्यव्यापी सार्वजनिक बंदचे आवाहन करण्यात आले होते. मात्र, यावर उच्च न्यायालयाने दिलेल्या निर्णयाविरूद्ध मा. सर्वोच्च न्यायालयात तातडीने दाद मागणे वेळेच्या मर्यादेमुळे शक्य नाही. भारतीय न्यायव्यवस्था संविधानात्मक संस्था असल्याने संविधानाचा आदर राखून उद्याचा बंद मागे घ्यावा, असे आवाहन करण्यात येते.
