जळगाव, 13 नोव्हेंबर : जळगाव जिल्ह्यात वाढत्या दुचाकी चोरीच्या घटना घडत असताना अमळनेर पोलिसांनी मोठी कामगिरी बजावली आहे. विविध ठिकाणांहून चोरीला गेलेल्या तब्बल 24 दुचाकींसह दोन संशयितांना नंदुरबार जिल्ह्यातून अटक करण्यात आली असून, या दुचाक्यांची एकूण किंमत सुमारे 15 लाखांपेक्षा अधिक असल्याचे पोलिसांकडून सांगण्यात आले आहे.
अटक करण्यात आलेले संशयित म्हणजे हिंमत रेंहज्या पावरा आणि अंबालाल भुरट्या खरर्डे (दोघे रा. सातपिंप्री, ता. शहादा, जि. नंदुरबार) अशी आहेत. पोलिसांनी गुप्त माहितीच्या आधारे धडगाव परिसरातील डोंगराळ भागात सापळा रचून दोघांनाही शिताफीने ताब्यात घेतले. दरम्यान, अमळनेर पोलिसांच्या या धडाकेबाज कारवाईमुळे चोरीच्या दुचाकींचे मोठे रॅकेट उघडकीस येण्याची शक्यता वर्तवली जात असून, एकाच वेळी तब्बल 24 दुचाकी जप्त केल्याने नागरिकांनी पोलिसांचे कौतुक केले आहे.
24 चोरीच्या दुचाकी पोलिसांनी केल्या हस्तगत –
चौकशीत दोघांनी अमळनेर तसेच इतर पोलीस ठाण्यांच्या हद्दीतून अनेक दुचाकी चोरी केल्याची कबुली दिली. यानंतर त्यांनी सांगतिल्यानुसार, पोलिसांनी सातपिंप्री येथील जंगल परिसरातून तब्बल 24 चोरीच्या दुचाकी हस्तगत केल्या. त्यात होंडा युनिकॉर्न, शाईन, बजाज पल्सर, टीव्हीएस रायडर, हीरो स्प्लेंडर अशा विविध कंपनींच्या दुचाकींचा समावेश आहे.
अमळनेर पोलीस ठाण्यात यापूर्वी नोंदविण्यात आलेल्या गुन्हे क्रमांक 308/2025, 299/2025 आणि 233/2025 मधील चोरीच्या वाहनांचा शोध सुरु होता. तपासादरम्यान सीसीटीव्ही फूटेज, तांत्रिक विश्लेषण आणि गुप्त माहितीच्या आधारे संशयितांचा माग काढण्यात पोलिसांना यश आले.
ताब्यातील दोन्ही संशयितांकडून हस्तगत केलेल्या दुचाकींचा पंचनामा करून त्या अमळनेर पोलीस ठाण्यात जमा करण्यात आल्या आहेत. दोघांनी आणखी काही चोरीच्या घटना केल्या आहेत का, याचा तपास सुरू आहे. तसेच सदर गुन्हाचा पुढील तपास पोहेकॉ काशिनाथ पाटील, पोकॉ सागर साळंखे हे करित आहेत.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर, आणि उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली. अमळनेर पोलीस निरीक्षक दत्तात्रय निकम यांच्या नेतृत्वाखाली गुन्हे शोध पथकातील उपनिरीक्षक शरद काकळीज, हवालदार प्रशांत पाटील, गणेश पाटील, उज्वलकुमार म्हसके, नितीन मनोरे, उज्वल पाटील आणि हितेश बेहरे यांनी ही कारवाई यशस्वी केली.
