ईसा तडवी, प्रतिनिधी
पाचोरा, 29 जानेवारी : देशात 76 वा प्रजासत्ताक दिन 26 जानेवारी रोजी उत्साहात साजरा करण्यात आला. दरम्यान, जळगावात प्रजासत्ताक दिनानिमित्त पोलीस विभागात गुणवत्तापूर्ण सेवा व 15 वर्षांच्या उत्कृष्ट कामगिरीसाठी अनेक पोलीस अधिकारी व कर्मचार्यांना सन्मानचिन्ह प्रदान करण्यात आले. यावेळी पाचोरा उपविभागीय पोलिस अधिकारी कार्यालयात कार्यरत असलेले शकील शेख यांनी सलग 15 वर्ष उत्कृष्ट कामगिरी केल्याबद्दल त्यांना जळगाव जिल्ह्याचे पालकमंत्री गुलाबराव पाटील यांच्या हस्ते महत्त्वाचे मानले जाणारे पोलिस महासंचालक पदकाने सन्मानित करण्यात आले.
पाचोरा उपविभागीय पोलिस अधिकारी कार्यालयात शकील शेख हे सहायक पोलीस उपनिरीक्षक पदावर कार्यरत आहेत. पाचोरा उपविभागात त्यांनी उत्कृष्ट तपास, कायदा व सुव्यवस्थेचे पालन आणि नागरिकांशी सौहार्दपूर्ण संवाद साधत पोलीस दलात उल्लेखनीय कार्य केले आहे. दरम्यान, 15 वर्ष उत्कृष्ट कामगिरी केल्याबद्दल 26 जानेवारी गणराज्य दिनाच्या दिवशी शकील शेख यांना पालकमंत्री गुलाबराव पाटील यांच्या हस्ते पोलीस महासंचालक पदकाने सन्मानित करण्यात आले आहे.
यावेळी जिल्हाधिकारी आयुष प्रसाद, पोलिस अधीक्षक डॉ. महेश्वर रेड्डी यांच्यासह पोलीस, महसूल तसेच शासनाच्या विविध विभागातील अधिकारी-कर्मचारी उपस्थित होते. दरम्यान, एएसआय शकील शेख यांच्या उत्कृष्ट कार्यासाठी त्यांना पोलीस महासंचालक पदकाने गौरविण्यात आल्याने त्यांचे सर्व स्तरांतून अभिनंदन व कौतुक होत आहे.
हेही वाचा : mahakumbh news : मोठी बातमी!, प्रयागराजमधील महाकुंभात चेंगराचेंगरी, 14 जणांचा मृत्यू, आजचे अमृतस्नान रद्द
