पारोळा, 28 एप्रिल: जळगाव जिल्ह्यात लाचप्रकरणांत वाढ झाली असताना एक मोठी बातमी समोर आली आहे. स्थायी आदेश मिळवून देण्यासाठी लाच मागणाऱ्या आरोग्य विभागातील अधिकाऱ्याला जळगाव लाललुचत प्रतिबंधक विभागाने (ACB) रंगेहात पकडल्याची घटना पारोळा येथे आज 28 एप्रिल रोजी उघडकीस आली आहे.
याबाबत मिळालेल्या माहितीनुसार, विजय प्रकाश वाघ (वय 42), सहायक अधीक्षक, कुटीर रुग्णालय पारोळा (ता. पारोळा, जि. जळगाव) यांनी तक्रारदाराकडून लाच स्वीकारल्याप्रकरणी त्यांच्याविरुद्ध भ्रष्टाचार प्रतिबंधक कायद्यान्वये कारवाई करण्यात आली आहे.
3 हजार रूपयांची मागितली लाच –
तक्रारदार हे कुटीर रुग्णालय पारोळा येथे अनुकंपा तत्वावर सफाई कामगार म्हणून कार्यरत आहेत. त्यांनी स्थायी आदेश मिळण्यासाठी दि. 13 एप्रिल 2026 रोजी वैद्यकीय अधिकाऱ्यांकडे अर्ज केला होता. त्यानंतर 24 एप्रिल रोजी तक्रारदार यांनी विजय वाघ यांची भेट घेतली असता, स्थायी आदेश तयार करून देण्यासाठी त्यांनी 3,000 रुपयांची मागणी केली.
…अन् एसीबीने 2 हजार रूपयांची लाच घेताना पकडले रंगेहात –
तक्रारदाराला लाच देण्याची इच्छा नसल्याने त्यांनी 28 एप्रिल रोजी अँटी करप्शन ब्युरो, जळगाव येथे तक्रार नोंदवली. त्यानुसार ACB पथकाने पंचासमक्ष पडताळणी केली असता वाघ यांनी तडजोडीनंतर 2,000 रुपयांची लाच स्वीकारताना रंगेहात पकडण्यात आले. या कारवाईनंतर आरोपीविरुद्ध पारोळा पोलीस ठाण्यात गुन्हा दाखल करण्याची प्रक्रिया सुरू आहे.
दरम्यान, आरोपीच्या अंगझडतीत 330 रुपये रोख रक्कम आणि विवो कंपनीचा मोबाईल फोन जप्त करण्यात आला आहे. ही कारवाई पोलिस उपअधीक्षक योगेश ठाकूर यांच्या मार्गदर्शनाखाली करण्यात आली असून, पोलिस निरीक्षक हेमंत नागरे यांनी तपासाची जबाबदारी सांभाळली. सापळा पथकात GPSI सुरेश पाटील, पोलिस हवालदार सुनिल वानखेडे आणि बाळू मराठे यांचा समावेश होता.
