सातारा, 31 जुलै : सोशल मीडिया हे आभासी जग आहे असे म्हटले जाते. मात्र, या आभासी जगातील घटनांचा धक्कादायक परिणाम वास्तवातील जीवनावर कसा होईल, हे सांगता येत नाही. असाच एक प्रकार सातारा जिल्ह्यातून समोर आला आहे. इंस्टाग्रामवर तरूणीने मुलाच्या नावाने फेक अकाऊंट बनवत स्वतःच्याच मैत्रीणीची मस्करी केली. मात्र, त्या मैत्रीणीने थेट गळफास घेतल्याची धक्कादायक घटना घडलीय. तब्बल 45 हून अधिक दिवसांनंतर ही घटना उघडकीस आली आहे. दरम्यान, याप्रकरणी फेक अकाउंट उघडून मस्करी केलेल्या तरुणीला पोलिसांनी अटक केलीय.
नेमकं काय घडलं? –
मिळालेल्या माहितीनुसार, साताऱ्यातील कोरेगाव तालुक्यातल्या वाठार पोलीस स्टेशनच्या हद्दीत असलेल्या एका गावातली तरुणी आणि दुसरी एक तरुणी दोघी मैत्रिणी होत्या. यात एकीने मस्करी करण्यासाठी मनीष नावाने इन्स्टाग्रामवर फेक अकाउंट उघडले. त्यावरून आपल्या जवळच्या मैत्रिणीला फ्रेंड रिक्वेस्ट पाठवली. यानंतर फेक अकाउंटवर दोघीही बोलत होत्या.
फेक अकाऊंटवरच्या मनीषच्या प्रेमात पडली –
दुसरी मैत्रिण फेक अकाउंटवरील मनीषला खरे समजून चक्क त्याच्या प्रेमात पडली. दरम्यान, भेटण्यासाठी तगादा लावला. मात्र, तरुणीने आणखी एक धक्कादायक कृत्य करत मनीषच्या प्रेमात पडलेल्या तरुणीला समजावण्यासाठी मैत्रिणीने आणखी एक शिवम पाटील नावाने अकाउंट काढले आणि त्यावरून आपण मनीषचे वडील असल्याचे सांगत त्याचा मृत्यू झालाय, असे प्रेमात पडलेल्या तरुणीला सांगितले.
अन् तरूणीने घेतला गळफास –
दरम्यान, मनीषच्या (फेक अकाऊंटवरील तरूण) मृत्यूचा धक्का प्रेमात पडलेल्या 24 वर्षीय तरुणीला सहन झाला नाही. दरम्यान, तिने नैराश्यातून 12 जून रोजी गळफास घेत आत्महत्या केली. तरुणीच्या आत्महत्येनंतर या प्रकऱणी वाठार स्टेशन पोलिसात अकस्मात निधनाची नोंद झाली होती. मात्र, सायबर पोलीसांच्या तपासातून इन्स्टाग्राम अकाउंटबाबत डिटेल्स समोर आल्यानंतर ही घटना उघडकीस आली आहे. आता या प्रकरणी संशयित तरुणीला पोलिसांकडून अटक करण्यात आली आहे. पोलीस पुढील तपास करत आहेत.
हेही वाचा : Big Breaking : वादग्रस्त महिला अधिकारी पूजा खेडकर यांचे IAS पद रद्द, UPSC ने केली मोठी कारवाई
