जळगाव, 6 फेब्रुवारी : जळगाव महानगरपालिकेच्या महापौर व उपमहापौर पदासाठीची निवड प्रक्रिया आज, गुरुवार दि. ६ फेब्रुवारी २०२६ रोजी सकाळी ११ वाजता विशेष सभेत पार पडली. या विशेष सभेत जळगाव महानगरपालिकेच्या महापौरपदी दीपमाला मनोज काळे यांची तर उपमहापौर पदासाठी मनोज सुरेश चौधरी यांची निवड करण्यात आली.
पिठासीन अधिकारी तथा जिल्हाधिकारी रोहन घुगे यांच्या अध्यक्षतेखाली महापौर व उपमहापौर पदाच्या निवडीसाठी विशेष सभा आयोजित करण्यात आली होती. यावेळी जिल्हाधिकारी रोहन घुगे तसेच महापालिका आयुक्त ज्ञानेश्वर ढेरे यांच्यासह उपस्थित मान्यवरांनी नवनिर्वाचित महापौर व उपमहापौर यांचे अभिनंदन करून त्यांच्या आगामी कार्यकाळासाठी शुभेच्छा व्यक्त केल्या.
दीपमाला काळे जळगावच्या 17 व्या महापौर –
महापालिका निवडणुकीत निर्विवाद बहुमत मिळवलेल्या महायुतीने परस्पर समन्वय राखत महापौर व उपमहापौर पदांसाठी प्रत्येकी एकच उमेदवारी अर्ज दाखल केला होता. त्यामुळे अपेक्षेप्रमाणे शुक्रवारी दोन्ही पदांची निवड बिनविरोध पार पडली. यामध्ये भाजपच्या दीपमाला काळे यांची जळगावच्या 17 व्या महापौर म्हणून निवड होऊन त्यांना हा मान मिळाला.
महापौर-उपमहापौर पदासाठी बिनविरोध निवड –
जळगाव महापालिकेत भारतीय जनता पक्षाने सर्वाधिक जागा जिंकत स्पष्ट आघाडी मिळवली आहे. त्यामुळे महापौरपद भाजपकडे तर उपमहापौरपद शिवसेना शिंदे गटाकडे जाणार, हे सुरुवातीपासूनच जवळपास निश्चित मानले जात होते. या राजकीय समीकरणानुसार महापौरपदासाठी भाजपकडून दीपमाला काळे, तर उपमहापौरपदासाठी शिवसेना शिंदे गटाकडून मनोज चौधरी यांचे उमेदवारी अर्ज दाखल करण्यात आले होते.
दोन्ही पदांसाठी अन्य कोणताही उमेदवारी अर्ज दाखल न झाल्याने दीपमाला काळे आणि मनोज चौधरी यांची निवड बिनविरोध होणार हे स्पष्ट झाले होते. दरम्यान, आज 6 फेब्रुवारी रोजी महापौर व उपमहापौर पदासाठीची निवड प्रक्रियेत त्यांच्या बिनविरोध निवडीवर अधिकृत शिक्कामोर्तब करण्यात आले.
जळगाव महानगरपालिका निवडणूक निकाल 2026 –
जळगाव महानगरपालिकेत भाजपने, शिवसेना (शिंदे गट) आणि राष्ट्रवादी काँग्रेस (अजित पवार गट) या तीन्ही पक्षांनी महायुती म्हणून निवडणूक लढवली. यामध्ये महायुतीने ऐतिहासिक विजय मिळवला. भारतीय जनता पक्षाने सर्वाधिक 46 जांगा जिंकल्या आहेत. तर शिंदेंच्या शिवसेनेने 22 आणि अजित दादांची राष्ट्रवादीने 6 पैकी 1 जागेवर विजय मिळवलाय. यामध्ये भाजप नंबर एकचा पक्ष ठरला असून जळगावात भाजपने पुन्हा एकदा आपले वर्चस्व सिद्ध केलं. तर ठाकरेंच्या शिवसेनेचे 5 उमेदवार निवडून आले आहेत. तर एका अपक्ष उमेदवाराने देखील विजय मिळवलाय.
हेही वाचा : अजित पवारांच्या निधनानंतर उपमुख्यमंत्री एकनाथ शिंदेंचा मोठा निर्णय; कार्यकर्त्यांसाठी केलं महत्वाचं आवाहन
