जळगाव, 21 एप्रिल: जळगाव जिल्हा आपत्ती व्यवस्थापन प्राधिकरण, जळगाव आणि जळगाव जिल्हा पोलीस दल यांच्या संयुक्त विद्यमाने पोलीस मुख्यालयातील पद्मालय हॉल येथे ‘आपत्ती प्रतिसाद किट’ (Disaster Response Kit) संदर्भात प्रशिक्षण व वितरण कार्यशाळेचे आयोजन करण्यात आले. या उपक्रमातून जिल्ह्यातील सर्व पोलीस स्टेशनना अद्ययावत आपत्ती प्रतिसाद किटचे वाटप करण्यात आले.
कार्यक्रमात जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष रोहन घुगे आणि पोलीस अधीक्षक डॉ. महेश्वर रेड्डी यांच्या हस्ते किटचे वितरण करण्यात आले. यावेळी जिल्ह्यातील सर्व पोलीस स्टेशनचे प्रभारी अधिकारी, उपविभागीय पोलीस अधिकारी (SDPO) तसेच पोलीस मुख्यालयातील वरिष्ठ अधिकारी मोठ्या संख्येने उपस्थित होते.
किट वितरणापूर्वी संबंधित पुरवठादारांच्या प्रशिक्षकांकडून आपत्तीच्या काळात या साहित्याचा प्रभावी वापर कसा करावा याबाबत सविस्तर तांत्रिक मार्गदर्शन करण्यात आले. यात आपत्कालीन परिस्थितीत तात्काळ प्रतिसाद देणे, बचावकार्याची गती वाढवणे आणि स्थानिक पातळीवर समन्वय साधणे यावर विशेष भर देण्यात आला.
नैसर्गिक किंवा मानवनिर्मित आपत्तीच्या वेळी पोलीस दलाची भूमिका अधिक प्रभावी करण्यासाठी या किटचा मोठा उपयोग होणार असल्याचे मत मान्यवरांनी व्यक्त केले. जिल्हाधिकारी रोहन घुगे यांनी आपत्ती व्यवस्थापनात पोलीस यंत्रणेचे महत्त्व अधोरेखित केले, तर पोलीस अधीक्षक डॉ. महेश्वर रेड्डी यांनी प्राप्त साहित्याची योग्य देखभाल करून ते नेहमी कार्यक्षम स्थितीत ठेवण्याच्या सूचना दिल्या.
जिल्हा प्रशासनाच्या आपत्ती सज्जतेचा एक भाग असलेल्या या उपक्रमामुळे जळगाव जिल्ह्यातील आपत्ती निवारण यंत्रणा अधिक सक्षम आणि सज्ज होणार असल्याचा विश्वास व्यक्त करण्यात आला.
