पारोळा (जळगाव), 12 फेब्रुवारी : जळगाव जिल्ह्यात लाचप्रकरणांच्या घटना घडत असताना पारोळा तालुक्यातून मोठी बातमी समोर आली आहे. पारोळा तालुक्यातील मेहू गावाच्या महिला सरपंचाला पती, मुलगा व सेतू केंद्र चालकासह लाचलुचपत विभागाने 40 हजारांच्या लाचप्रकरणी अटक केली आहे. दरम्यान, या घटनेमुळे पारोळा तालुक्यात खळबळ उडाली आहे.
जिजाबाई गणेश पाटील, (वय 43 वर्ष, मेहु ता. पारोळा), असे महिला सरपंचाचे तर मुलाचे शुभम गणेश पाटील/देवरे (वय 26 वर्ष) तसेच गणेश सुपडू पाटील (वय 55 वर्ष) असे महिला सरपंचाच्या पतीचे नाव आहे. यासोबतच समाधान देवसिंग पाटील (वय 35 वर्ष, रा. बोदडे ता. पारोळा) सेतू केंद्र चालक अशा चौघांना अटक करण्यात आली आहे.
लाचप्रकरण नेमकं काय? –
मिळालेल्या माहितीनुसार, पारोळा तालुक्यातील मेहू या गावात जिल्हा क्रीडा अधिकारी कार्यालय जळगाव यांच्या मार्फतीने 7 लाख रूपयांचा निधी ग्रामपंचायत मेहु यांना मंजुर केला होता. दरम्यान, 7 लाख रुपये किमतीची व्यायामशाळा बांधण्यासाठी धनश्री कंट्रक्शन या कंपनीला करार देण्यात आला होता. यावेळी 2023 मध्ये लोकनियुक्त सरपंच म्हणून जिजाबाई गणेश पाटील यांची निवड झाली होती.
दरम्यान, धनश्री कंट्रक्शनच्या प्रतिनिधीने जिल्हा क्रीडा अधिकारी कार्यालयामार्फत मंजूर झालेल्या निधीची मागणी सरपंचांकडे केली. यावेळी सरपंचांनी 7 लाख रुपयांपैकी 4 लाख रुपयांचा धनादेश कंपनीला दिला होता. तसेच उर्वरित 3 लाख रुपयांचा निधी देण्यासाठी सरपंचांनी 70 हजार रुपयांची लाच मागितली होती.
40 हजार रुपयांची लाच स्वीकारली –
सरपंच जिजाबाई गणेश पाटील यांच्या पती गणेश सुपडू पाटील यांनी या रकमेची तडजोड करून ती 40 हजार रुपयांवर आणली. त्यानंतर, सरपंचांचा मुलगा शुभम गणेश पाटील आणि सेतू सुविधा केंद्र चालक समाधान देवसिंग पाटील याला लाच स्वीकारण्यासाठी प्रोत्साहन दिले. दरम्यान, समाधान पाटील यास 40 हजार रुपयांची लाच स्वीकारत असताना जळगावच्या लाचलुचपत विभागाच्या पथकाने रंगेहात पकडले.
हेही पाहा : IPS Dr. Maheshwar Reddy: सोशल मीडिया, क्राइम, तरुणाई; Jalgaon SP डॉ. महेश्वर रेड्डींची विशेष मुलाखत
अन् एसीबीच्या पथकाने सापळा रचत केली कारवाई –
जळगाव लाचलुचपत प्रतिबंधक विभागाचे पोकॉ राकेश दुसाने आणि पोकॉ अमोल सुर्यवंशी यांनी सापळा रचला. यावेळी त्यांनी सरपंच जिजाबाई गणेश पाटील, तिचा पती गणेश सुपडू पाटील, मुलगा शुभम गणेश पाटील आणि सेतू सुविधा केंद्र चालक समाधान देवसिंग पाटील यांना लाच घेताना पकडत तात्काळ अटक केली. दरम्यान, याप्रकरणी पारोळा पोलीस ठाण्यात गुन्हा दाखल करण्यात आला असून पुढील तपास सुरू आहे.
नाशिक लाचलुचपत प्रतिबंधक विभागाच्या शर्मिष्ठा घारगे-वालावलकर यांच्या मार्गदर्शनाखाली लाप्रवि जळगावचे पोलीस उपधीक्षक योगेश ठाकूर यांच्या आदेशाने पोलीस निरीक्षक नेत्रा जाधव, पीएसआय दिनेशसिंग पाटील, पीएसआय सुरेश पाटील, पोकॉ राकेश दुसाने, पोकॉ अमोल सुर्यवंशी यांनी ही कारवाई केली आहे.
