मिलिंद वाणी, प्रतिनिधी
चोपडा, 6 ऑक्टोबर : चोपडा तालुक्यातील अनवर्दे खुर्द येथील रहिवासी सामाजिक कार्यकर्ते आदिवासी सेवक संजीव पांडुरंग शिरसाठ यांच्या पत्नी माजी सरपंच सौ. सविताबाई संजीव शिरसाठ यांचे शनिवार 5 ऑक्टोबर 2024 रोजी रात्री 10.25 वाजता अपघाती मृत्यू झाला. दरम्यान, या घटनेचे वृत्त गावभर पसरतात सर्वत्र शोककळा पसरली.
काय आहे संपुर्ण बातमी? –
मिळालेल्या माहितीनुसार, सविताबाई शिरसाठ ह्या घटस्थापनेच्या प्रथम दिवशी सप्तश्रृंगी गडावर देवी दर्शनासाठी जायला निघाल्या असतांना नाशिक येथील तात्पुरत्या निवासाजवळून अवघ्या हाकेच्याअंतरावर असलेल्या जत्रा हॉटेल जवळील हायवे रस्त्यावरून जात असताना कमकुवत कामाचे लेअर खचल्याने मोटार सायकलवरून पडून मेंदूला जबर दुखापत झाली.
नाकातून व तोंडातून व कानातून अति रक्तस्त्राव होत असल्याने तात्काळ लोकमान्य हास्पिटलला उपचारार्थ दाखल करण्यात आले. जवळपास तीन दिवस मृत्यूशी झुंज देत असताना शनिवारी त्यांची प्राणज्योत मालवली. त्या पत्रकार महेश शिरसाठ व कैलास शिरसाठ यांच्या भावजयी असून त्यांच्या पश्चात इंजिनिअर पवन व इंजिनिअर अनुष्का ही दोन मुले आहेत.
लासगावच्या दोन सख्या भावांचा पुण्यात अपघातात मृत्यू –
दुचाकी आणि पिकअप वाहन यांच्या समोरासमोर झालेल्या धडकेत दुचाकीवरील दोन्ही सख्ख्या भावांचा जागीच मृत्यू झाला आहे. विजय आधार भालेराव (वय-26), अशोक आधार भालेराव (वय-21) अशी या दोन्ही सख्ख्या मृत भावांची नावे आहेत. मृत तरुण जळगाव जिल्ह्यातील पाचोरा तालुक्यातील लासगाव गावातील रहिवासी आहेत. अपघाताची ही दुर्देवी घटना पुणे जिल्ह्यातील आळेफाटा पोलीस स्टेशनच्या हद्दीत घडली.
