धुळे, 4 जुलै : राज्यभरात गुन्हेगारीच्या घटनांमध्ये वाढ होत असताना धुळे जिल्ह्यातून धक्कादायक घटना समोर आली आहे. पत्नीला शिवीगाळ केल्याच्या रागातून मोठ्या भावाने लहान भावाला लाकडी दांडक्याने बेदम मारहाण करीत त्याचा खून केल्याची घटना मंगळवार रोजी धुळे जिल्ह्यातील नवे कोठारे गावात घडली.
सुका बाळू कोळपे (वय 50) असे मयत भावाचे नाव असून मुका बाळू कोळपे (वय 60) असे संशयिताचे नाव आहे. याप्रकरणी संशयितावर गुन्हा दाखल करुन त्याला सोनगीर पोलिसांनी त्याला अटक केली आहे.
पत्नीला शिवगाळ केल्याचा आला राग अन् केला खून –
मिळालेल्या माहितीनुसार, धुळ्यातील नवे कोठारे गावातील सुका बाळू कोळपे याने मंगळवारी सकाळी 9 वाजेच्या सुमारास मोठा भाऊ मुका बाळू कोळपे याच्या पत्नीला काहीतरी कौटुंबिक वादातून शिवीगाळ केली होती. दरम्यान, त्याचा राग येऊन मुका कोळपे याने लाकडी दांडक्याने सुका यास पाठीवर, हातावर व डोक्यावर बेदम मारहाण केली असता यात त्याचा मृत्यू झाला.
याबाबत पिरन दगड्डू कोळपे यांनी दिलेल्या फिर्यादीवरून संशयित मुका कोळपे याच्या विरोधात भारतीय न्याय संहिता कायदा कलम १०३/१ प्रमाणे गुन्हा दाखल करण्यात आला असून पोलिसांनी मुका कोळपे याला मंगळवारी रात्री अटक केल्याचे समजते. दरम्यान, या प्रकरणी पुढील तपास पोलीस करत आहेत.
हेही वाचा : Breaking : टीम इंडिया भारतात दाखल, आज संध्याकाळी मुंबईत विजयी मिरवणूक, असे आहे नियोजन
