पाचोरा, 18 जानेवारी : महिला ही अबला नसून सबला आहे. आज प्रत्येकच क्षेत्रात महिला आघाडीवर आहेत. त्या काळातील इतिहासाकडे देखील आपण नजर फिरविली तर नारी शक्तीची प्रचिती येते, असे प्रतिपादन शिवसेना नेत्या वैशालीताई सुर्यवंशी यांनी केले.
पाचोरा शहरातील शिवतीर्थ, जयकिसन कॉलनी, भडगाव रोड येथे संक्रांतीच्या निमित्ताने काल मंगळवारी 17 जानेवारीला हळदी कुंकवाचा कार्यक्रम आयोजित करण्यात आला होता. याप्रसंगी त्या बोलत होत्या.
या कार्यक्रमाची सुरुवात मान्यवरांच्या हस्ते दीपप्रज्वलन व प्रतिमा पूजनाने करण्यात आली. यावेळी व्यासपीठावर शिवसेना महिला आघाडी जिल्हाध्यक्षा महानंदा पाटील, जळगावच्या महापौर जयश्रीताई महाजन, वैशालीताई सूर्यवंशी, कमलबाई पाटील, दिपाली माने, तिल्लोतमा मौर्य आदी मान्यवर उपस्थित होते. यावेळी महिलांकडून एकमेकांना हळदीकुंकूचा वाण देण्यात आला.
काय म्हणाल्या वैशालीताई सूर्यवंशी –
संस्काराच्या जपणुकीसह महिलांनी हवे त्या क्षेत्रामध्ये प्रगती गाठण्यासाठी अंगी आत्मविश्वास महत्वाचा आहे आणि हाच आत्मविश्वास वाढविण्यासाठी आम्ही विविध उपक्रम राबवित आहोत. महिलांना एक विशिष्ट चौकटीत न राहता चौकटीत बाहेर येऊन काम करावे. तसेच महिलांच्या कार्यांना सशक्त करून महिलांनी सक्षम व्हावे. संक्रांतीच्या शुभेच्छा देत नारिशक्तीचा जागर व्हावा, म्हणून अशा कार्यक्रमाचे आयोजन केले आहे, असेही शिवसेना नेत्या वैशालीताई सुर्यवंशी यावेळी म्हणाल्या.
हेही वाचा – पाचोरा : विद्यार्थी बनले न्यायाधीश अन् वकील, निर्मल इंटरनॅशनल स्कूलमध्ये “अभिरूप न्यायालय” उपक्रम
दरम्यान, या कार्यक्रमात विविध स्पर्धाही आयोजित करण्यात आल्या होत्या. या स्पर्धांमध्ये महिलांनी मोठ्या प्रमाणात सहभाग नोंदवला. यानंतर विविध स्पर्धांमध्ये विजेत्या महिलांना बक्षिसांचे वाटप करण्यात आले.
या कार्यक्रमाचे प्रास्ताविक लक्ष्मी पाटील यांनी तर सूत्रसंचालन राजश्री पाटील यांनी केले. तसेच उपस्थितांचे आभार नर्मदा पांडे यांनी मानले. या कार्यक्रमाच्या यशस्वीतेसाठी मंदाकिनी पारोचे, जयश्री येवले, अनिता पाटील, सुनिता देवरे, कुंदन पांड्या आदींसह शिवसेना महिला आघाडी पदाधिकारींनी परिश्रम घेतले.
