धुळे, 3 डिसेंबर : जिल्ह्यातील शिंदखेडा तालुक्यातील अक्कलकोस शासकीय माध्यमिक आश्रमशाळेतील मुख्याध्यापिकेस लाच घेताना रंगेहाथ पकडल्याचे धक्कादायक प्रकरण समोर आले आहे.
नेमंक काय आहे प्रकरण? –
शिंदखेडा तालुक्यातील अक्कलकोस शासकीय माध्यमिक आश्रमशाळेतील सेवानिवृत्त शिक्षकाचे गट विमा योजनेचे 1 लाख 33 हजाराचे बिल उपकोषागार कार्यालयात पाठविण्यासाठी चार हजारांची लाच स्विकारतांना मुख्याध्यापिका अर्चना बापूराव जगताप यांना लाचलुचपत प्रतिबंधक विभागाच्या पथकाने रंगेहात पकडले.
मुख्याध्यापिकेने मागतली लाच –
शिंदखेडा तालुक्यातील अक्कलकोस येथील शासकीय माध्यमिक आश्रमशाळेतील सेवानिवृत्त शिक्षकाकडून त्यांच्या गट विमा योजनेचे मंजूर झालेले 1 लाख 33 हजार 484 रुपयाचे बिल अदा करण्यासाठी शिंदखेडा येथील उपकोषागार कार्यालयात पाठविण्यासाठी आश्रमशाळेच्या मुख्याध्यापिका अर्चना जगताप यांनी 5 हजाराची लाच मागितली होती.
लाच स्वीकारताना पकडले रंगेहाथ –
दरम्यान, सेवानिवृत्त शिक्षकाने धुळे लाचलुचपत प्रतिबंधक विभागाकडे दुरध्वनीवरुन तक्रार केली होती. त्याप्रमाणे विभागाच्या पथकाद्वारे दोंडाईचा येथे जाऊन तक्रार सेवानिवृत्त शिक्षकांची तक्रार घेण्यात आली. तक्रारीची 1 जानेवारी रोजी दुपारी पडताळणी केली. मुख्याध्यापिका अर्चना जगताप यांना तक्रारदार सेवानिवृत्त शिक्षकाकडून तडजोडीअंती 4 हजाराची लाच स्वीकारत असतांना रंगेहात पकडले. त्यांच्याविरोधात दोंडाईचा पोलीस स्टेशनला भ्रष्टाचार प्रतिबंध कलमान्वये गुन्हा दाखल करण्यात आला आहे.
सदरची कारवाई लाचलुचपत प्रतिबंधक धुळे विभागाचे पोलीस उप अधीक्षक अभिषेक पाटील यांच्या मार्गदर्शनाखाली पोलीस निरीक्षक रुपाली खांडवी तसेच पथकातील राजन कदम, मुकेश अहिरे, संतोष पावरा, रामदास बारेला, प्रशांत बागुल, मकरंद पाटील, प्रविण मोरे, प्रविण पाटील, सुधीर मोरे आणि जगदीश बडगुजर या पथकाने केले. गुन्ह्याचा पुढील तपास सुरु आहे.
