पाचोरा, 11 जून : जळगाव जिल्ह्यात वीजा आणि वादळी वाऱ्यांची तीव्र सक्रियता निर्माण झाली आहे. तसेच पाचोरा तालुक्यातील विविध भागात वादळी वाऱ्यासह मुसळधार पावसाने हजेरी लावलीय. दरम्यान, सर्व नागरिकांनी सावधगिरी बाळगण्याचे आवाहन जळगाव जिल्हा प्रशासनाने केले आहे.
पाचोरा तालुक्यात मुसळधार पाऊस –
लासगाव, सामनेर, बांबरूड (राणीचे) तसेच नांद्रा इत्यादी भागासह पाचोरा तालुक्यात विजेच्या गडगडाटासह पावसाने जोरदार हजेरी लावलीय. पाचोरा तालुक्यात आज सांयकाळी 7 वाजेपासून विजेच्या गडगडाटास सुरूवात झाली. यानंतर विजेच्या गडगडाटासह सोसट्याचा वारा वाहू लागला. दरम्यान, पाचोरा तालुक्यातील विविध भागात जवळपास 20 ते 30 मिनिटे मुसळधार पाऊस झालाय.
वीजपुरवठा खंडित –
पाचोरा तालुक्यातील ग्रामीण भागांत वादळी पाऊस झाल्याने वीज पुरवठा खंडीत झालाय. पावसाच्या जोरदार तडाख्यामुळे अनेक ठिकाणी वीज पोल व तारांमध्ये तांत्रिक बिघाड झालाय. अनेक ठिकाणी झाडे तसेच वीज पोल कोलमडून पडल्याने वीज पुरवठा खंडित झालाय.
जिल्हा प्रशासनाचे महत्वाचे आवाहन –
जळगाव जिल्ह्यात वीजा आणि वादळी वाऱ्यांची तीव्र सक्रियता निर्माण झालीय. यामुळे सर्व नागरिकांनी सावधगिरी बाळगावी. घराबाहेर पडणे टाळा, सुरक्षित ठिकाणी थांबण्याचे तसेच आपत्कालीन परिस्थितीत जिल्हा आपत्ती व्यवस्थापन हेल्पलाईन क्रमांक 1077 वर त्वरित संपर्क साधण्याचे आवाहन जिल्हा प्रशासनाकडून करण्यात आले आहे.
