जळगाव, 8 जुलै : युवा शक्तीच्या माध्यमातून पुढच्या काही वर्षात विकसित भारत घडू शकतो, असे प्रतिपादन कुलगुरू प्रा. व्ही. एल. माहेश्वरी यांनी केले. कवयित्री बहिणाबाई चौधरी उत्तर महाराष्ट्र विद्यापीठात राष्ट्रीय सेवा योजनेच्या विद्यापीठस्तरीय प्रेरणा शिबिराचे उद्घाटन कुलगुरूंच्या हस्ते करण्यात आले. त्यावेळी ते बोलत होते. यावेळी मंचावर प्र-कुलगुरू प्रा. एस. टी इंगळे, विद्यापीठाच्या व्यवस्थापन परिषदेचे सदस्य ॲड अमोल पाटील, कुलसचिव डॉ. विनोद पाटील, अधिसभा सदस्य केदारनाथ कवडीवाले, नितीन ठाकूर, अमोल मराठे, स्वप्नाली काळे, रासेयोचे संचालक डॉ. सचिन नांद्रे हे होते.
कुलगुरू प्रा. व्ही.एल.माहेश्वरी काय म्हणाले? –
यावेळी कुलगुरू प्रा. माहेश्वरी म्हणाले की, आपला देश जगातील सर्वात तरुण संख्या असलेला देश आहे. तरुण ऊर्जेने आणि उत्साहाने भरलेले आहेत. याच तरुणांच्या माध्यमातून पुढच्या काही वर्षात आपण विकसित भारत घडवू शकतो. त्यासाठी या तरुणांना योग्य दिशा देण्याची गरज आहे म्हणून विद्यार्थ्यांचा शिक्षणासोबतच सर्वांगीण विकास व्हावा यासाठी विद्यापीठाच्या माध्यमातून कुलगुरू प्रेरणा शिबिराचे आयोजन करण्यात आले आहे. निश्चितच या शिबिराच्या माध्यमातून विद्यार्थ्यांनी आपला व्यक्तिमत्व विकास करत जास्तीत जास्त ज्ञान अर्जित करावे, असे आवाहन करत विद्यार्थ्यांना शुभेच्छा दिल्या.
शिबिराच्या आयोजनाला सुरूवात –
व्यवस्थापन परिषदेचे सदस्य ॲड. अमोल पाटील यांनी विद्यार्थ्यांना मार्गदर्शन करताना सांगितले की, विद्यापीठाच्या माध्यमातून श्रम संस्कार शिबिराचे आयोजन करण्याचा प्रस्ताव सिनेटच्या बैठकीत मांडला. कुलगुरू महोदयांनी त्याला लगेच मान्यता दिली आणि याच माध्यमातून या शिबिराच्या आयोजनाला सुरुवात झाली आहे. यावर्षी युद्धजन्य परिस्थिती आणि देशासमोरील आव्हाने या संदर्भात तरुण काय योगदान देऊ शकतात याबाबत विद्यार्थ्यांना प्रशिक्षण व मार्गदर्शन करणाऱ्या तज्ञांचे व्याख्याने आयोजित करण्यात आली आहे.
कुलगुरू प्रेरणा शिबिराचे आयोजन –
विद्यापीठ विद्यार्थ्यांच्या व्यक्तिमत्त्व विकासात भर घालण्यासाठी व विद्यार्थ्यांमध्ये श्रमसंस्कार रुजविण्यासाठी विद्यापीठात 8 जुलै ते 14 जुलै 2025 असे सात दिवसीय कुलगुरू प्रेरणा शिबिराचे आयोजन करण्यात आले आहे. या शिबिरात विद्यापीठ संलग्नित महाविद्यालयातील जळगाव धुळे व नंदुरबार जिल्ह्यातील 270 स्वयंसेवकांनी ऑनलाईन नोंदणी करत सहभाग नोंदवला आहे.
