ईसा तडवी, प्रतिनिधी
पाचोरा, 2 ऑक्टोबर: पाचोरा तालुक्यातील सारोळा खुर्द येथील ग्रामपंचायतीच्या 15 व्या वित्त आयोगाच्या निधीतून करण्यात आलेल्या विकासकामांमध्ये कथित बोगस कामे तसेच आर्थिक अफरातफर झाल्याचा आरोप करत चौकशीची मागणी करण्यात आली होती. या मागणीसाठी पाचोरा तहसील कार्यालयासमोर सुरू करण्यात आलेले उपोषण प्रशासनाच्या अधिकृत आश्वासनानंतर 1 ऑक्टोबर रोजी मागे घेण्यात आले.
उपोषणकर्ते चंद्रकांत विजय पाटील आणि अमोल प्रभाकर पाटील यांनी ग्रामपंचायतीच्या विकासकामांबाबत प्रश्न उपस्थित केले होते. संबंधित कामांची प्रत्यक्ष पाहणी, कागदपत्रांची तपासणी तसेच झालेल्या आर्थिक व्यवहारांची चौकशी करून वस्तुस्थिती समोर आणावी आणि दोषी आढळणाऱ्यांवर कायदेशीर कारवाई करावी, अशी त्यांची मागणी होती.
12 ऑक्टोबरला चौकशी समितीची प्रत्यक्ष पाहणी –
उपोषणाची सांगता करताना पंचायत समितीचे सहाय्यक गटविकास अधिकारी श्री. पाटणकर यांनी प्रशासनाची भूमिका स्पष्ट केली. सारोळा खुर्द ग्रामपंचायतीच्या १५ व्या वित्त आयोगाच्या विकासकामांबाबत प्राप्त तक्रारींची चौकशी करण्यासाठी १२ ऑक्टोबर २०२६ रोजी चौकशी समिती ग्रामपंचायतीला प्रत्यक्ष भेट देणार असल्याचे त्यांनी सांगितले.
या चौकशीदरम्यान संबंधित विकासकामांची प्रत्यक्ष पाहणी करण्यासोबतच ग्रामपंचायतीची कागदपत्रे, कामांवरील खर्च आणि आर्थिक व्यवहारांच्या तपशीलाची पडताळणी केली जाणार आहे. दरम्यान, प्रशासनाकडून चौकशीचे अधिकृत आश्वासन मिळाल्यानंतर उपोषणकर्त्यांनी आपले उपोषण मागे घेतले.
मान्यवरांच्या उपस्थितीत उपोषणाची सांगता –
उपोषणाची सांगता जिल्हा परिषद लोहटार-खडकदेवळा गटाचे डॉ. भरत पाटील, पाचोरा तालुका शिवसेना प्रमुख राजेंद्र पाटील आणि शिवसेना उपतालुका प्रमुख छोटू आप्पा सारोळा यांच्या उपस्थितीत झाली. त्यांच्या हस्ते उपोषणकर्त्यांना लिंबू पाणी देऊन उपोषण सोडण्यात आले.
यावेळी पंचायत समितीचे सहाय्यक गटविकास अधिकारी पाटणकर, विस्तार अधिकारी परदेशी व बोरसे, तसेच सारोळा येथील ग्रामसेवक सुनील पाटील उपस्थित होते. विशाल पाटील, संजय पाटील, महेंद्र अहिरे, गौतम अहिरे यांच्यासह ग्रामस्थांचीही उपस्थिती होती.
चौकशीच्या अहवालाकडे ग्रामस्थांचे लक्ष –
15 व्या वित्त आयोगाच्या निधीतून झालेल्या विकासकामांची गुणवत्ता, प्रत्यक्ष कामाची स्थिती आणि खर्चाच्या विवरणाबाबत होणारी चौकशी आता महत्त्वाची ठरणार आहे. १२ ऑक्टोबर रोजी होणाऱ्या प्रत्यक्ष पाहणीत काय निष्पन्न होते आणि चौकशी समितीच्या अहवालातून कोणती वस्तुस्थिती समोर येते, याकडे सारोळा खुर्द ग्रामस्थांचे लक्ष लागले आहे.
हेही वाचा: दुष्काळग्रस्त भागांची पाहणी करण्यासाठी महसूलमंत्री चंद्रशेखर बावनकुळे उद्या जळगाव जिल्हा दौऱ्यावर
