जळगाव, 19 जुलै: विशेष मतदार नोंदणी पुनरिक्षण (SIR) मोहिमेच्या पार्श्वभूमीवर जिल्हाधिकारी रोहन घुगे यांनी जळगाव शहर मतदारसंघातील विविध भागांना भेट देऊन प्रत्यक्ष कामकाजाची पाहणी केली. यावेळी त्यांनी मतदान केंद्रस्तरीय अधिकारी (BLO) यांच्यासोबत विठ्ठलवाडी, सिंधी कॉलनी आणि तांबापुरा परिसरात मतदारांच्या घरी जाऊन विशेष संक्षिप्त पुनरिक्षण प्रक्रियेची अंमलबजावणी तपासली.
या दौऱ्यादरम्यान जिल्हाधिकारी रोहन घुगे यांनी मतदार नोंदणीसाठी आवश्यक असलेल्या एन्युमरेशन फॉर्म (EF) भरणे, त्यांची पडताळणी करणे तसेच फॉर्म संकलनाची प्रक्रिया बारकाईने पाहिली. BLO अधिकारी मतदारांना आवश्यक माहिती योग्य पद्धतीने देत आहेत का, तसेच नागरिकांकडून फॉर्म वेळेत भरून घेतले जात आहेत का, याची त्यांनी प्रत्यक्ष खातरजमा केली.
यावेळी जिल्हाधिकाऱ्यांनी परिसरातील नागरिकांशी संवाद साधत विशेष मतदार नोंदणी पुनरिक्षण (SIR) प्रक्रियेविषयी माहिती दिली. मतदार यादी अचूक, अद्ययावत आणि त्रुटीमुक्त ठेवण्यासाठी प्रत्येक पात्र नागरिकाने आवश्यक माहिती व कागदपत्रांसह एन्युमरेशन फॉर्म भरून सहकार्य करावे, असे आवाहन त्यांनी केले.
मतदार नोंदणी प्रक्रियेत कोणत्याही पात्र मतदाराचे नाव वगळले जाणार नाही, तसेच नागरिकांच्या शंकांचे तत्काळ निरसन करण्यासाठी प्रशासन कटिबद्ध असल्याचेही त्यांनी स्पष्ट केले. जिल्हा प्रशासनाकडून सुरू असलेल्या या विशेष मोहिमेमुळे मतदार नोंदणी प्रक्रिया अधिक प्रभावी आणि पारदर्शक होण्यास मदत होणार असल्याचा विश्वास व्यक्त करण्यात आला.
