जळगाव, 28 जून : जळगाव जिल्ह्यातील तरुणांसाठी शासन आपल्या दारी अभियानातंर्गत पंडीत दीनदयाल उपाध्याय या रोजगार मेळाव्याचे आयोजन करण्यात आले होते. या रोजगार मेळाव्यात 1074 उमेदवारांची प्राथमिक निवड करण्यात आली आहे.
जळगाव जिल्हा कौशल्य विकास रोजगार व उद्योजकता मार्गदर्शन केंद्र, जळगाव कार्यालयाने 27 जून, 2023 रोजी सकाळी 10 वाजेपासून “शासन आपल्या दारी” या उपक्रमातंर्गत पंडीत दीनदयाल उपाध्याय या रोजगार मेळाव्याचे आयोजन करण्यात आले होते. जळगाव शहरातील नूतन मराठा महाविद्यालय, जळगाव या मेळाव्याचे आयोजन करण्यात आले होते. यावेळी पालकमंत्री गुलाबराव पाटील आणि जिल्हाधिकारी अमन मित्तल यांची प्रमुख उपस्थिती होती.
हेही वाचा – जळगाव : येत्या 3 जुलैला जिल्हास्तरीय लोकशाही दिनाचे आयोजन; वाचा, सविस्तर माहिती
या मेळाव्यासाठी एकूण 12 औद्योगिक/खासगी आस्थापनांनी दहावी पास, बारावी पास, आयटीआय, डिप्लोमाधारक, पदवीधर आणि इतर शैक्षणिक पात्रताधारक उमेदवारांना रोजगाराच्या संधी उपलब्ध करुन दिल्या होत्या. या रोजगार मेळाव्यासाठी एकूण 2241 रिक्तपदे कळविण्यात आली होती. मेळाव्यास 1335 उमेदवार उपस्थित होते. त्यापैकी 1074 उमेदवारांची प्राथमिक निवड झाली असून 46 उमेदवारांची अंतिम निवड झाली आहेत.
विविध आस्थापनांच्या स्टॉलवर भेटी देऊन मुलाखती दिलेल्या उमेदवारांची निवड प्रक्रियेची कार्यवाही उद्योजकांचे स्तरावर सुरू असल्याचे वि. जा. मुकणे, सहाय्यक आयुक्त, जिल्हा कौशल्य विकास रोजगार व उद्योजकता मार्गदर्शन केंद्र, जळगाव यांनी कळविली आहे.
