जळगाव, 13 ऑगस्ट : कवयित्री बहिणाबाई चौधरी उत्तर महाराष्ट्र विद्यापीठाच्या राष्ट्रीय सेवा योजना एककांमध्ये हर घर तिरंगा अभियान-2025 राबविण्यात येते आहे. या माध्यमातून आज विद्यापीठाचे कुलसचिव डॉ. विनोद पाटील हस्ते विद्यापीठाच्या प्रशासकीय इमारतीवर तिरंगा लावण्यात आला. यावेळी राष्ट्रीय सेवा योजनेचे संचालक डॉ. सचिन नांद्रे, वित्त विभागाचे महेंद्र पाटील, शिक्षकेत्तर कर्मचारी उपस्थित होते.
हर घर तिरंगा अभियान 2025 –
विद्यापीठासह संलग्नित महाविद्यालयांमध्ये दि.2 ते 15 ऑगस्ट, 2025 या कालावधीत राष्ट्रीय सेवा योजना एककांमध्ये हर घर तिरंगा अभियान- २०२५ राबविण्यात येते आहे. दि.13 ते 15 ऑगस्ट, 2025 दरम्यान तिरंगा रॅली, मशाल रैली, तिरंगा मानवी साखळीचे आयोजन, तिरंगा महोत्सव, तिरंगा सोबत सेल्फी, रांगोळी स्पर्धा, वक्तृत्व स्पर्धा, भित्तीपत्रक स्पर्धा, प्रश्न मंजूषा इ. उपक्रमाचे आयोजन महाविद्यालय स्तरावर करण्यात येत आहे.
यंदाचा 78 वा स्वातंत्र्यदिन –
यंदा 15 ऑगस्ट रोजी स्वातंत्र्याचा 78 वा वर्धापन दिन आहे. देशभरात हा दिवस अत्यंत उत्साहात व देशभक्तीच्या वातावरणात साजरा होत आहे. स्वातंत्र्यसंग्रामातील हुतात्म्यांच्या बलिदानाची आठवण ठेवत, प्रत्येकाने तिरंग्याबद्दल आदर व्यक्त करण्यासाठी आपल्या घरावर तिरंगा फडकवावा तसेच “माझा तिरंगा – माझा अभिमान” ही भावना सर्वांच्या मनात दृढ करण्याचे आवाहन करण्यात आले आहे.
