पुणे – गेल्या काही दिवसात अनैतिक संबंधातून खून, बलात्कार, तसेच आर्थिक फसवणुकीच्या घटना समोर येत आहेत. यातच आता पुण्यातून एक अत्यंत धक्कादायक घटना समोर आली आहे. पुण्यात एका पतीने आपल्या पत्नीची अत्यंत निर्घृणपणे हत्या केल्याची घटना समोर आली आहे.
शिवदास तुकाराम गीते असे आरोपी पतीचे नाव आहे. पुण्याच्या खराडी परिसरात ही धक्कादायक घटना घडली. पत्नीची हत्या करुन आरोपी पती शिवदास तुकाराम गीते हा पोलीस ठाण्यात हजर झाला. पत्नी आपली मालमत्ता हडप करेल, असे त्याला वाटत असल्याने त्याने ही हत्या केली. पोलिसांनी याबाबत माहिती दिली आहे.
पोलिसांनी दिलेल्या माहितीनुसार, आरोपीने सकाळी साडेचार वाजेच्या सुमारास आपल्या राहत्या घरात आपल्या पत्नीची घरघुती कारणावरुन भांडण झाल्याने आणि चारित्र्याच्या संशयावरुन शिलाई मशीनची कात्री मानेत खुपसून हत्या केली.
याप्रकरणी चंदन नगर पोलीस ठाणे यांनी अपराध क्रमांक 40/25, भारतीय न्याय संहिता कलम 103/1 अन्वये नोंद करण्यात आली आहे. तसेच आरोपीला अटक करण्यात आली आहे. या प्रकरणाचा पुढील तपास सहाय्यक पोलीस निरीक्षक राहुल कोळपे करत आहे. दरम्यान, माणुसकीला काळिमा फासणाऱ्या या घटनेने परिसरात खळबळ उडाली आहे.
गृहखात्याने कारवाईची मागणी –
या घटनेनंतर शिवसेना ठाकरे गटाच्या उपनेत्या सुषमा अंधारे आणि काँग्रेस नेते रवींद्र धंगेकर यांनी या प्रकरणी गृहखात्याने कारवाई करावी, अशी मागणी केली आहे. पुण्यात क्रौर्याला लाजवेल, अशी घटना घडली आहे. पोलिसांचा धाक उरलेला नाही अशी प्रतिक्रिया सुषमा अंधारेंनी दिली आहे.
हेही वाचा – जळगाव रेल्वे अपघात; 12 जणांचा दुर्दैवी मृत्यू, पाचोरा ते माहिजी स्थानकादरम्यान नेमकं काय घडलं? A टू Z मुद्दे
