मुंबई, 31 जुलै : राज्यभरात गेल्या काही दिवसांपासून ऑनलाइन समस्यांमुळे रेशन दुकानातील मोफत धान्य नागरिकांना मिळत नव्हते. यामुळे स्वस्त धान्य दुकानदार देखील त्रस्त झाले होते. दरम्यान, त्यांनी केलेल्या मागणीनंतर आता राज्याचे अन्न, नागरी पुरवठा मंत्री छगन भुजबळ यांनी ऑफलाइन धान्य वितरणाचे आदेश दिले आहेत. या निर्णयामुळे राज्यभरातील नागरिकांना दिलासा मिळालाय.
ऑफलाइन धान्य वितरणाचे आदेश –
राज्यात काही दिवसांपासून रास्त भाव दुकानांमधील ई-पॉस मशिनमधून अन्नधान्य वितरण करताना तांत्रिक अडचणी येत होत्या. यावरून स्वस्त धान्य दुकानदारांनी निवेदन देत या तांत्रिक समस्येमुळे अन्न-धान्य वितरण ऑफलाइन करण्यास मान्यता देण्याची विनंती क्षेत्रीय कार्यालयांनी केली होती. दरम्यान, त्यांच्या मागणीनंतर आता राज्याचे अन्न, नागरी पुरवठा मंत्री छगन भुजबळ यांनी ऑफलाइन धान्य वितरणाचे आदेश दिले आहेत. मात्र, स्वस्त धान्य दुकानातून धान्य घेणाऱ्या नागरिकांना बायोमेट्रीक हजेरी आवश्‍यक असल्याची देखील माहिती समोर आलीय. त्यासाठी पुरवठा विभागाने रास्त भाव दुकानांमध्ये 4-जी तंत्रज्ञान असलेल्या ई-पॉस मशिन बसविले आहेत.
मंत्री छगन भुजबळ काय म्हणाले? –
राज्यात रेशन धान्याचे ऑनलाईन पद्धतीने वितरण करत असताना येत असलेल्या अडचणी लक्षात घेता यावर विचार करून नागरिकांना तातडीने रेशनचा लाभ देण्यासाठी आपण ऑफलाइन पद्धतीने रेशनचे वाटप करावे, असे मंत्री छगन भुजबळ यांनी विभागाला सांगितले. सर्वरमध्ये झालेल्या समस्येमुळे राज्यातील अनेक नागरिक रेशनपासून (मोफत धान्य) वंचित राहण्याची शक्यता निर्माण झाली होती. त्यामुळे मंत्री भुजबळ यांनी तातडीने विभागाची बैठक घेत ऑफलाइन धान्य देण्याचे आदेश जारी केले आहेत. ‘कितीही तांत्रिक समस्या विभागापुढे निर्माण झाल्या तरी राज्यातील एकही नागरिक धान्यापासून वंचित राहणार नाही. नेहमीप्रमाणेच प्रत्येक नागरिकाच्या घरात धान्य पोचवले जाईल, असे ते मंत्री छगन भुजबळ यांनी स्पष्ठ केलंय.
हेही वाचा : मैत्रिणीनं इन्स्टाग्रामवर बनवलं फेक अकाऊंट, तरुणी पडली प्रेमात, बनावट लव्ह स्टोरीत एकीची आत्महत्या
