भुसावळ, 25 ऑगस्ट : अपघाताच्या एका घटनेनंतर आमदार अमोलभाऊ जावळे यांच्यातील तत्परता आणि संवेदनशीलतेचे दर्शन सर्वांना झाले आहे. फैजपूर-हंबर्डी मार्गावरील चोरवड येथे काल सकाळी प्रमोद लहानू रजाने यांचा दुर्दैवी अपघात झाला. अपघात झाल्यानंतर काही काळ रस्त्यावर गोंधळाचे वातावरण निर्माण झाले असतानाच, योगायोगाने या मार्गाने प्रवास करीत असलेले रावेर विधानसभा मतदारसंघाचे आमदार अमोलभाऊ जावळे यांची नजर या अपघाताच्या घटनेकडे गेली.
यावेळी अपघातग्रस्ताला पाहताच आमदार अमोल भाऊ जावळे यांनी क्षणाचाही विलंब न करता तातडीने आपली गाडी थांबवली. तसेच स्वतः पुढाकार घेत रजाने यांना गाडीत घेतले आणि थेट फैजपूर येथील रुग्णालयात दाखल केले. रुग्णाला त्वरित वैद्यकीय उपचार मिळावेत यासाठी आमदार जावळे यांनी डॉक्टरांशी संवाद साधून आवश्यक ती सर्व चौकशीही केली.
अचानक घडलेल्या या प्रसंगात आमदार अमोलभाऊ जावळे यांनी दाखवलेली तत्परता आणि संवेदनशीलता ही केवळ मदत नसून खरी माणुसकीचे दर्शन घडवणारी आहे आणि सामाजिक बांधिलकीची जाणीव ठेवून संकटाच्या क्षणी सर्वसामान्यांच्या मदतीसाठी धाव घेणारा नेता म्हणजेच खरा जनसेवक, अशी भावना स्थानिक नागरिकांतून व्यक्त होत आहे.
