मुंबई, 25 जून: ईशान्य मुंबईचे खासदार संजय दिना पाटील यांनी पत्रकारांना अश्लाघ्य भाषेत शिवीगाळ करत जीवे मारण्याची धमकी दिल्याचा धक्कादायक प्रकार समोर आला आहे. ठाकरे गटातून नुकताच शिवसेना शिंदे गटात प्रवेश केलेल्या संजय दिना पाटील यांच्या या कृत्यामुळे संपूर्ण महाराष्ट्रातील राजकीय आणि माध्यम वर्तुळात तीव्र संतापाची लाट उसळली आहे. दरम्यान, आधी पत्रकारांना शिवीगाळ केल्यानंतर खासदार पाटील यांनी माफी मागत संपुर्ण प्रकरणाबाबत दिलगिरी व्यक्त केली आहे.
नेमकं काय घडलं? –
मुंबईत काही माध्यम प्रतिनिधी राजकीय घडामोडींवर आणि ठाकरे गटाचे नेते संजय राऊत यांनी केलेल्या आरोपांवर प्रतिक्रिया घेण्यासाठी खासदार संजय दिना पाटील यांच्याकडे गेले होते. सुरुवातीला प्रश्नांची उत्तरे दिल्यानंतर, पत्रकारांनी त्यांच्या कौटुंबिक आणि राजकीय भूमिकेबाबत पुढील प्रश्न विचारताच पाटील यांचा संयम सुटला.
दरम्यान, त्यांनी अत्यंत खालच्या पातळीवर जाऊन कॅमेऱ्यासमोरच पत्रकारांना अर्वाच्च भाषेत शिवीगाळ केली. “मी खासदार आहे हे विसरून जाईन, माझ्या वाटेला पुन्हा आलात तर मारून पाठवेन, पोलिसांसमोर सांगतोय काय करायचं ते करा,” अशी उघड धमकी त्यांनी दिली.
सर्वस्तरातून जाहीर निषेध आणि तीव्र प्रतिक्रिया –
या घटनेचा व्हिडिओ समाजमाध्यमांवर वेगाने व्हायरल झाल्यानंतर पत्रकार संघटना आक्रमक झाल्या आहेत. टीव्हीजे तसेच ‘पुणे श्रमिक पत्रकार संघ’ आणि इतर पत्रकार संघटनांनी या बेजबाबदार वर्तनाचा तीव्र शब्दांत निषेध नोंदवला आहे. पत्रकारांनी त्यांच्या पत्रकार परिषदा आणि पक्षाच्या कार्यक्रमांवर बहिष्कार टाकण्याचा इशारा दिला आहे. विरोधी पक्षांनीही या मुद्द्यावरून सत्ताधाऱ्यांवर कडाडून टीका केली असून लोकशाहीच्या चौथ्या स्तंभावर झालेल्या या हल्ल्याप्रकरणी कारवाईची मागणी केली आहे.
वाढत्या दबावानंतर जाहीर दिलगिरी –
चौफेर टीका आणि पत्रकार संघटनांच्या आक्रमक पवित्र्यानंतर खासदार संजय दिना पाटील यांनी अखेर एक व्हिडिओ जारी करून जाहीर माफी मागितली आहे. “मागील काही दिवसांपासून माझ्यावर आणि माझ्या कुटुंबावर खोटे आरोप केले जात असल्याने मी तणावात होतो. अनवधानाने माझ्या तोंडातून ते अपशब्द निघाले. या प्रकाराबद्दल मी पत्रकार समूहाची मनापासून दिलगिरी व्यक्त करतो,” असे स्पष्टीकरण त्यांनी दिले आहे.
