ईसा तडवी, प्रतिनिधी
पहाण (पाचोरा), 2 मे: पाचोरा तालुक्यातील पहाण येथे ‘मुख्यमंत्री बळीराजा शेत पाणंद रस्ता’ योजनेअंतर्गत रस्ता कामाचा शुभारंभ महाराष्ट्र दिनाचे औचित्य साधून (दि. 1 मे) उत्साहात पार पडला.
या कामाचे भूमिपूजन आमदार किशोर आप्पा पाटील यांच्या हस्ते करण्यात आले. यावेळी जळगावचे जिल्हाधिकारी रोहन घुगे, जिल्हा परिषदेच्या मुख्य कार्यकारी अधिकारी करीष्मा नायर, प्रांताधिकारी भूषण अहिरे, तहसीलदार विजय बनसोडे तसेच गटविकास अधिकारी तुकाराम मुंडे यांची प्रमुख उपस्थिती होती.
View this post on Instagram
पहाण येथील जिल्हा परिषद शाळेपासून ते नामदेव रामचंद्र पाटील यांच्या शेतापर्यंतचा हा पाणंद रस्ता असून, त्यासाठी प्रशासकीय व तांत्रिक मंजुरी मिळाल्यानंतर प्रत्यक्ष कामास सुरुवात करण्यात आली आहे. सदर काम राज्य शासनाच्या निधीतून ‘श्री शीतल ग्रुप’ या कंत्राटदारामार्फत पूर्ण करण्यात येणार आहे.
उद्घाटन प्रसंगी आमदार किशोर आप्पा पाटील यांनी सांगितले की, पावसाळ्यात कच्च्या रस्त्यांमुळे शेतकऱ्यांना शेतात जाण्यास अडचणी येत होत्या. या योजनेमुळे शेतमालाची वाहतूक सुलभ होऊन शेतकऱ्यांची दीर्घकालीन समस्या मार्गी लागेल. जिल्हाधिकारी रोहन घुगे यांनी संबंधित यंत्रणांना काम दर्जेदार व वेळेत पूर्ण करण्याच्या सूचना दिल्या.
या प्रसंगी उपविभागीय अधिकारी भूषण अहिरे, तहसील प्रशासनातील अधिकारी, स्थानिक लोकप्रतिनिधी तसेच परिसरातील शेतकरी मोठ्या संख्येने उपस्थित होते.
