ईसा तडवी, प्रतिनिधी
पाचोरा, 20 जानेवारी : पाचोरा नगरपरिषदेत शिवसेनेने मोठ्या बहुमताने सत्ता मिळवली असून उपनगराध्यक्ष, स्वीकृत सदस्य आणि गटनेत्यांची निवड देखील करण्यात आली आहे. यानंतर आता पाचोरा नगरपरिषदेत विविध समित्यांसाठी सभापती तसेच सदस्यांची निवड काल 19 जानेवारी रोजी दुपारी पार पडली. दरम्यान, पाचोरा नगरपरिषदेच्या लोकनियुक्त नगराध्यक्षा सुनिताताई पाटील यांनी सभापती तसेच सदस्यांचे आभार मानत माध्यमांसोबत संवाद साधला.
पाचोऱ्यात “नगराध्यक्ष-नगरपालिका आपल्या दारी” उपक्रम –
नगराध्यक्षा सुनिताताई पाटील म्हणाल्या की, पाचोरा नगरपरिषदेत विविध समित्यांवर सभापती आणि सदस्यांची निवड पार पडली असून त्यांचे मी मनापासून अभिनंदन करते. पुढील महिन्यात 23 फेब्रवारीला संत गाडगेबाबा यांची जयंती आहे. या पार्श्वभूमीवर शहरातील स्वच्छता हा मुख्य विषय असून येत्या 26 जानेवारी पासून ते 23 फेब्रुवारीपर्यंत पाचोऱ्यात “नगराध्यक्ष-नगरपालिका आपल्या दारी” हे अभियान राबविणार आहे. यामध्ये प्रत्येक वार्डात स्वच्छतेची टीम घेऊन शहर स्वच्छ करण्याचे काम हाती घेतले आहे.
नागरिकांच्या आरोग्यासाठी स्वच्छतेकडे राहणार लक्ष –
केवळ वार्डाची स्वच्छता करण्याकरिता हा विषय मर्यादित नसून हा संपुर्ण शहराचा स्वच्छतेच्या जबाबदारी असल्याचे त्यांनी सांगितले. तर नागरिकांचे आरोग्य चांगले राहण्यासाठी सर्वात आधी शहर स्वच्छतेकडे आमचे लक्ष राहणार असल्याचेही त्या म्हणाल्या. आमदार किशोर आप्पा पाटील यांनी पाचोऱ्यात दृष्टीला पडतील अशी कामे केली असल्याचेही सुनिताताई पाटील यांनी नमूद केले.
याप्रसंगी आमदार किशोर आप्पा पाटील, उपनगराध्यक्ष किशोर बारवकर, मुख्याधिकारी मंगेश देवरे, नगरसेवक संजय गोहील, गणेश पाटील, प्रविण ब्राम्हणे, शेतकरीसेनेचे जिल्हाप्रमुख सुनिल पाटील, नवनियुक्त नगरसेवक यांच्यासह परिषदेचे अधिकारी-कर्मचारी उपस्थित होते.
हेही वाचा : पाचोरा नगरपरिषदेत सहा विषय समित्यांची घोषणा; कोणाची कोणत्या समितीच्या सभापतीपदी निवड? वाचा, एका क्लिकवर
