पाचोरा, 18 मे: पाचोरा कृषी उत्पन्न बाजार समितीत मका, ज्वारीसह विविध शेतीमालाच्या खरेदीदरम्यान वजन काट्यात तफावत होत असल्याचा मुद्दा शेतकरी सेनेच्या पदाधिकाऱ्यांनी प्रशासनाकडे उपस्थित केला. यानंतर तहसील प्रशासनाने तातडीने दखल घेत बाजार समितीच्या कार्यालयात बैठक आयोजित केली. या बैठकीत प्रशासनाकडून तात्काळ तपासणीचे निर्देश देण्यात आले आहेत.
सध्या रब्बी हंगामातील शेतीमाल विक्रीसाठी शेतकरी बाजार समितीत आणत आहेत. मात्र, काही व्यापाऱ्यांकडून खरेदी झालेला माल बाहेरील गोदामांमध्ये उतरवून तेथे वजन केले जात असल्याची तक्रार शेतकऱ्यांनी केली. दोन वेगवेगळ्या भुईकाट्यांमध्ये सुमारे ३० किलोपर्यंत तफावत आढळल्याचा मुद्दाही बैठकीत मांडण्यात आला.
या पार्श्वभूमीवर शेतकरी सेनेचे जिल्हाप्रमुख सुनील पाटील, प्रहार जनशक्ती पक्षाचे तालुकाध्यक्ष गुलाबराव पाटील, ईश्वर पाटील तसेच शेतकरी प्रतिनिधी यांनी शेतकऱ्यांच्या विविध मागण्यांचे निवेदन बाजार समितीचे सचिव आणि तहसीलदार विजय बनसोडे यांच्याकडे निवेदन दिले. त्यानंतर तहसीलदारांनी बाजार समितीत तातडीची बैठक घेऊन संबंधित विषयाची माहिती घेतली. बैठकीला बाजार समितीचे सचिव बाळासाहेब बोरुडे, व्यापारी असोसिएशनचे मनोज सिसोदिया यांच्यासह व्यापारी व शेतकरी उपस्थित होते.
यावेळी सर्व वजन काट्यांची तपासणी करण्याचे तसेच तफावत आढळल्यास संबंधितांवर कारवाई करण्याचे निर्देश प्रशासनाकडून देण्यात आले. दरम्यान, शेतकरी प्रतिनिधींनी भविष्यात अशा प्रकारांना आळा बसावा, यासाठी संबंधितांवर कठोर कारवाई करण्याची मागणीही केली.
शेतकऱ्यांच्या विविध प्रश्नांवर उपाययोजना करा – शेतकरी सेनेचे मागणी
शासकीय हमीभावात वाढ जाहीर करण्यात आली असली तरी खरेदी प्रक्रिया अधिक गतिमान करण्याची आवश्यकता असल्याचे शेतकरी प्रतिनिधींनी बैठकीत मांडले. नोंदणीकृत शेतकऱ्यांच्या संख्येनुसार खरेदीचा लक्षांक वाढवावा तसेच गोदामे व गोणपाटांची वेळेत उपलब्धता करावी, अशी मागणी करण्यात आली.
याशिवाय, खरीप हंगामाच्या पार्श्वभूमीवर ट्रॅक्टरसाठी डिझेल पुरवठा सुरळीत ठेवण्याची मागणीही करण्यात आली. शेतकऱ्यांना योग्य दर, पारदर्शक प्रक्रिया आणि आवश्यक सुविधा मिळाव्यात, यासाठी प्रशासनाने सकारात्मक पावले उचलावीत, अशी अपेक्षा शेतकरी सेनेकडून व्यक्त करण्यात आली.
याप्रसंगी शिवसेना तालुकाप्रमुख विनोद तावडे, नाना वाघ, अरुण पाटील, एडवोकेट दीपक पाटील, जीभाऊ पाटील, संतोष पाटील, शरद पाटील, योगेश पवार आदी प्रमुख पदाधिकारी व शेतकरी उपस्थित होते.
