पिंपळगाव हरे.(पाचोरा), 5 एप्रिल: पाचोरा तालुक्यातील पिंपळगाव हरेश्वर परिसरात पोलिसांनी अवैध धंद्यांवर मोठी कारवाई करत गुटखा, दारू, गांजा आणि सट्टा व्यवसायावर एकाच वेळी धडक कारवाई केली आहे. गुप्त माहितीनुसार टाकलेल्या छाप्यात गुटखा व देशी-विदेशी दारूचा साठा जप्त करण्यात आला. यासोबतच गांजा सेवन करणारा आणि सट्टा चालवणाऱ्यांवरही गुन्हे दाखल करण्यात आले आहेत. विविध ठिकाणी समांतर कारवाई करत पोलिसांनी अवैध व्यवसायांवर लगाम घालण्याचा प्रयत्न केला आहे. दरम्यान, या कारवाईमुळे परिसरात खळबळ उडाली असून पोलिसांच्या कारवाईचे स्वागत केले जात आहे.
सहाय्यक पोलीस निरीक्षक कल्याणी वर्मा यांना मिळालेल्या गुप्त माहितीनुसार, पिंपळगाव हरे येथील माळी मंगल कार्यालयाच्या मागील एका घरात गुटखा व देशी-विदेशी दारूची विक्री सुरू असल्याचे समोर आले. त्यानुसार पोलिसांनी तात्काळ छापा टाकून मंगलबाई प्रदीप निकम, सिद्धांत प्रदीप निकम आणि अमित प्रदीप निकम यांच्या घरातून सुमारे ८,१६२ रुपयांचा सुगंधित तंबाखू व पानमसाला तसेच ६,२७० रुपयांची देशी-विदेशी दारू जप्त केली. या प्रकरणी संबंधितांविरुद्ध भारतीय न्याय संहिता (BNS) तसेच अन्न सुरक्षा आणि मानके अधिनियम 2006 आणि महाराष्ट्र दारूबंदी कायद्यान्वये गुन्हा दाखल करण्यात आला आहे.
दरम्यान, पिंपळगाव हरे येथील कालीका माता चौकात विजय आत्माराम जगताप हा गांजा बाळगत व सेवन करताना आढळून आला. त्याच्याविरुद्ध NDPS कायद्यान्वये कारवाई करण्यात आली. तसेच वरखेडी येथील अशोक भिका पाटील हा देशी दारूची विक्री करताना पकडण्यात आला असून त्याच्याविरुद्धही महाराष्ट्र दारूबंदी कायद्यानुसार गुन्हा दाखल करण्यात आला आहे.
याशिवाय, लोहारा दूरक्षेत्रातील कु-हाड खु. येथे पांडुरंग फकिरा तिरमल हा सट्टा चालवत असल्याचे उघडकीस आले. त्याच्यासह सट्टा चालवण्यास प्रवृत्त करणारा संदीप भाऊसाहेब पाटील (रा. कृष्णापुरी, पाचोरा) यांच्याविरुद्धही महाराष्ट्र जुगार कायद्यानुसार गुन्हा नोंदविण्यात आला आहे.
यांनी केली कारवाई –
ही सर्व कारवाई पोलीस अधीक्षक महेश्वर रेड्डी यांच्या आदेशानुसार, अप्पर पोलीस अधीक्षक कविता नेरकर व उपविभागीय पोलीस अधिकारी बापू रोहम यांच्या मार्गदर्शनाखाली सहाय्यक पोलीस निरीक्षक कल्याणी वर्मा, पोहेकॉ अभिजित निकम, पोहेकॉ किरण ब्राम्हणे, पोहेकॉ तात्याबा नागरे, पोहेकॉ शैलेश चव्हाण, पोना राहुल बेहरे, पो.कॉ भारत पाटील, पो.कॉ नामदेव इंगळे, पोकॉ अमोल पाटील पो.कॉ शाम हटकर, मपोकों मंजु खंदारे, चा.पो.ना दिपक अहिरे यांनी केली.
हेही वाचा: रावेरमध्ये आधुनिक केळी शेती व मूल्यवर्धन प्रक्रियेची जिल्हाधिकाऱ्यांकडून पाहणी
