जळगाव, 11 ऑगस्ट: जिल्हा कौशल्य विकास, रोजगार व उद्योजकता मार्गदर्शन केंद्र, जळगाव आणि शासकीय औद्योगिक प्रशिक्षण संस्था, जळगाव यांच्या संयुक्त विद्यमाने शासकीय औद्योगिक प्रशिक्षण संस्था, जळगाव येथे दि. १३ ऑगस्ट २०२६ रोजी सकाळी १० वाजता प्लेसमेंट ड्राईव्हचे आयोजन करण्यात आले आहे.
या प्लेसमेंट ड्राईव्हमध्ये EGEARZ या नामांकित उद्योजकासह विविध पदांसाठी उमेदवारांच्या मुलाखती घेण्यात येणार आहेत. यामध्ये फिटर, मेंटेनन्स, टर्नर, फाउंड्रीमॅन, मॅकेनिक मशिन टूल, ऑपरेटर अॅडव्हान्स मशिन टूल आदी पदांचा समावेश आहे.
पात्रता धारण करणाऱ्या इच्छुक उमेदवारांनी या सुवर्णसंधीचा लाभ घ्यावा, असे आवाहन करण्यात आले आहे. “महास्वयम् रोजगार संकेतस्थळ” https://rojgar.mahaswayam.gov.in येथे नोंदणी केलेल्या उमेदवारांनी आपल्या यूजर आयडी व पासवर्डने लॉगिन करून उपलब्ध रिक्तपदांसाठी अर्ज करावा.
ज्या उमेदवारांनी अद्याप नाव नोंदणी केलेली नाही, त्यांनीही सर्व शैक्षणिक पात्रतेची आवश्यक कागदपत्रे घेऊन मुलाखतीच्या दिवशी उपस्थित राहावे.
याबाबत काही अडचण असल्यास किंवा अधिक माहितीसाठी कार्यालयीन कामकाजाच्या दिवशी सकाळी ९.४५ ते सायंकाळी ६.१५ या वेळेत जिल्हा कौशल्य विकास, रोजगार व उद्योजकता मार्गदर्शन केंद्र, शासकीय तांत्रिक विद्यालय परिसर, जी.एस. ग्राऊंडजवळ, जळगाव येथे प्रत्यक्ष भेट द्यावी किंवा ०२५७-२९५९७९० या दूरध्वनी क्रमांकावर संपर्क साधावा, असे आवाहन संदीप ज्ञा. गायकवाड, सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, जळगाव यांनी केले आहे.
हेही वाचा: “काशीचा नशामुक्तीचा संदेश जळगावच्या प्रत्येक गावात पोहोचला पाहिजे” — केंद्रीय राज्यमंत्री रक्षा खडसे
