जळगाव, 5 जानेवारी : जळगाव जिल्ह्यात अवैध गुटखा वाहतूक व विक्रीविरोधात स्थानिक गुन्हे शाखा व मुक्ताईनगर पोलीस स्टेशनच्या पथकाने कारवाई करत एकास अटक केली असून सुमारे 10 लाख 19 हजार 20 रुपयांचा मुद्देमाल जप्त करण्यात आला आहे. अरबाज नौशाद बेग (वय 30, रा. काझी हाऊस, खुलताबाद, जि. छत्रपती संभाजीनगर) असे अटक केलेल्या वाहनचालकाचे नाव आहे.
नेमकी बातमी काय? –
पोलीस अधीक्षक डॉ. महेश्वर रेड्डी यांच्या आदेशानुसार, जळगाव जिल्ह्यात अवैध गुटखा वाहतूक करणाऱ्यांविरोधात कारवाई करण्याचे निर्देश स्थानिक गुन्हे शाखेला देण्यात आले होते. त्यानुसार वरिष्ठ पोलीस निरीक्षक राहुल गायकवाड यांना गोपनीय बातमीदारामार्फत माहिती मिळाली की, पांढऱ्या रंगाच्या मारुती सुझुकी एर्टिगा (क्रमांक MH-46-81065) या वाहनातून मुक्ताईनगर मार्गे बऱ्हाणपूर (म.प्र.) ते छत्रपती संभाजीनगरच्या दिशेने अवैध गुटख्याची वाहतूक होणार आहे.
मिळालेल्या माहितीनुसार, स्थानिक गुन्हे शाखा व मुक्ताईनगर पोलीस स्टेशनच्या पथकाने पुरनाड फाटा येथे सापळा रचला. संशयित वाहन भरधाव वेगात येताना दिसताच पोलिसांनी थांबविण्याचा प्रयत्न केला, मात्र चालकाने वाहन खामखेडा गावाच्या दिशेने पळवले. अखेर, पाठलाग करून पोलिसांनी वाहन अडवले.
10 लाखांचा मुद्देमाल जप्त –
वाहन चालकाचे नाव अरबाज नौशाद बेग (वय 30, रा. काझी हाऊस, खुलताबाद, जि. छत्रपती संभाजीनगर) असे असून त्याच्या ताब्यातून रजनीगंधा सुगंधित पान मसाला, करमचंद प्रीमियम पान मसाला, मिराज तंबाखू, विमल पान मसाला, पान पराग, जाफराणी जर्दा यांसह वाहन व मोबाईल फोन असा एकूण 10,19,020 रुपयांचा मुद्देमाल जप्त करण्यात आला आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी सुभाष ढवळे, वरिष्ठ पोलीस निरीक्षक राहुल गायकवाड व पोलीस निरीक्षक आशिष आडसुळ यांच्या मार्गदर्शनाखाली करण्यात आली.
कारवाईत सहाय्यक पोलीस निरीक्षक जयेश पाटील, पोलीस उपनिरीक्षक निलेश गोसावी, तसेच दोन्ही नेम- मुक्ताईनगर पो.स्टे, पोह. विजय पाटील, श्रीकृष्ण पाटील, प्रेमचंद सपकाळे, विनोद पाटील, रविंद्र चौधरी, सलिम तडवी, छगन तायडे, रतनहरी गिते, हेंमत पाटील, सर्व नेमणुक-स्थानिक गुन्हे शाखा, जळागंव व पो.अं. गोविंद सुरवाडे, गोविंद पवार सहभागी होते.
हेही वाचा : मराठी ही केवळ संवादाची नव्हे, तर रोजगाराची भाषा व्हावी – उपमुख्यमंत्री एकनाथ शिंदे
