भुसावळ, 30 मे: जळगाव जिल्ह्यातील लाचखोरीच्या प्रकरणांमध्ये वाढ झाली असताना मोठी बातमी समोर आली आहे. भुसावळ येथील बाजारपेठ पोलीस ठाण्यातील एका पोलीस उपनिरीक्षकाविरुद्ध लाचलुचपत प्रतिबंधक विभागाने गुन्हा दाखल केला आहे. या प्रकरणात एका खासगी व्यक्तीचाही समावेश असून दोघांना फरार घोषित करण्यात आले आहे.
पोलीस उपनिरीक्षक राजू सांगळे (बाजारपेठ पोलीस ठाणे, भुसावळ) आणि सलीम हकीम कुरेशी (रा. बोदवड) अशी संशयितांची नावे आहेत. दोघांनी मिळून तक्रारदाराकडून 30 हजार रुपयांची लाच मागितल्याचा आरोप आहे. नंतर ही रक्कम २० हजार रुपयांवर ठरविण्यात आल्याचे तपासात समोर आले आहे.
नेमकं प्रकरण काय? –
मिळालेल्या माहितीनुसार, 28 मार्च रोजी तक्रारदार आणि त्याच्या मित्राचा एका व्यक्तीसोबत पैशांच्या व्यवहारावरून किरकोळ वाद झाला होता. या प्रकरणात तक्रारदार आणि त्याच्या मित्राविरुद्ध बाजारपेठ पोलीस ठाण्यात गुन्हा दाखल करण्यात आला होता.
या गुन्ह्यात अटक टाळण्यासाठी पोलीस उपनिरीक्षक राजू सांगळे आणि सलीम कुरेशी यांनी तक्रारदाराच्या पत्नीमार्फत लाचेची मागणी केल्याची तक्रार लाचलुचपत प्रतिबंधक विभागाकडे करण्यात आली. तक्रारीची पडताळणी केल्यानंतर लाचेची मागणी झाल्याचे निष्पन्न झाले.
तपासादरम्यान, तक्रारदाराला अटक न करता केवळ ‘चॅप्टर केस’ करून सोडून देण्यासाठी २० हजार रुपये स्वीकारण्याची तयारी दर्शविण्यात आल्याचेही आढळून आले. प्रत्यक्ष लाचेची रक्कम स्वीकारली गेली नसली, तरी लाच मिळविण्याचा प्रयत्न केल्याप्रकरणी दोघांविरुद्ध भ्रष्टाचार प्रतिबंधक कायद्यानुसार गुन्हा दाखल करण्यात आला आहे.
ही कारवाई लाचलुचपत प्रतिबंधक विभागाचे उपअधीक्षक योगेश ठाकूर, पोलीस निरीक्षक स्मिता नवघरे, हेमंत नागरे, उपनिरीक्षक दिनेशसिंग पाटील, सुरेश पाटील तसेच अमोल पाटील, भूषण पाटील यांच्या पथकाने यशस्वी केली. दरम्यान, भ्रष्टाचारसंबंधी काही माहिती असल्यास अथवा लाच मागणाऱ्या लोकसेवकाबद्दल काही तक्रार असल्यास लाचलुचपत प्रतिबंधक विभाग, जळगाव यांच्याशी संपर्क साधण्याचे आवाहन पोलीस उपअधीक्षक योगेश ठाकुर यांनी केले आहे.
