पुणे, 7 एप्रिल : गर्भवती महिला तनिषा भिसे यांच्या मृत्यूप्रकरणानंतर पुण्यातील प्रसिद्ध दीनानाथ मंगेशकर रुग्णालय सध्या गंभीर वादात सापडले असताना महत्वाची बातमी समोर आली आहे. गर्भवती महिला तनिषा भिसे यांच्या मृत्यूप्रकरणी करण्यात आलेल्या चौकशीत रुग्णालयाला गंभीर दोषी ठरवण्यात आले असल्याची माहिती राज्य महिला आयोगाच्या अध्यक्षा रूपाली चाकणकर यांनी आज दिली. पुणे पोलीस आयुक्तालयात आयोजित केलेल्या पत्रकार परिषदेत ते त्यांनी ही माहिती दिली. तसेच रुग्णालयाकडून वैद्यकीय सेवा देण्यात झालेल्या हलगर्जीपणामुळे तसेच रुग्णालयाने वेळेवर योग्य उपचार न दिल्यामुळे मृत्यू झाल्याचा ठपका ठेवण्यात आला आहे.
रूपाली चाकणकर यांनी दिली माहिती –
पुण्यातील गर्भवती मृत्यू प्रकरणासंदर्भातील अहवाल हा सरकारला सादर करण्यात आला. यानंतर रूपाली चाकणकर पत्रकार परिषदेत म्हणाल्या की, साडेपाच तास गर्भवती महिला रूग्ण मंगेशकर रूग्णालयात होती. त्यांच्यावर उपचार झाले असते तर त्या वाचल्या असत्या. त्यांच्या मृत्यूला रूग्णालय जबाबदार आहे. रूग्णालयाने हलगर्जीपणा अन् मग्रुरीपण केलेला आहे. दरम्यान, मंगेशकर रूग्णालयाने स्वतःला वाचवण्यासाठी तनिषा भिसे यांच्या आजरपणाबाबतच्या गोपनीय गोष्टी सार्वजनिक केल्या. नक्कीच दीनानाथ रूग्णालयावर गुन्हा दाखल होणार असल्याचे चाकणकर यांनी सांगितले. तसेच याप्रकरणाचा अंतिम आणि सविस्तर अहवाल संध्याकाळी प्रसिद्ध केला जाणार असल्याची माहिती त्यांनी यावेळी दिली.
नेमकं काय प्रकरण? –
तनिषा भिसे या गर्भवती महिलेला पुण्यातील दीनानाथ मंगेशकर रूग्णालयात उपचारासाठी दाखल करण्यात आले होते. मात्र, रूग्णालयाच्यावतीने उपचारांसाठी कुटुंबियांकडून 10 लाख रुपयांची मागणी करण्यात आली होती. दरम्यान, प्रसुती दरम्यान तनिषा भिसे या महिलेचा मृत्यू झाल्यानंतर राज्यभरातून संताप व्यक्त केला गेला. याप्रकरणी मुख्यमंत्र्यांनी चौकशीचे आदेश दिले. दरम्यान, चौकशीच्या अहवालातून आता दीनानाथ मंगेशकर रूग्णालय दोषी असल्याची माहिती रूपाली चाकणकर यांनी दिलीय.
रूग्णालयातील डॉ. सुश्रुत घैसास यांचा राजीनामा –
दरम्यान, गर्भवती महिलेच्या मृत्यूप्रकरणावर वेगवेगळी माहिती समोर येत असतानाच डॉ. सुश्रुत घैसास यांनी रुग्णालय प्रशासनाकडे आपल्या पदाचा राजीनामा सुपूर्द केला आहे. डॉ. घैसास हे या प्रकरणात मुख्य डॉक्टर होते आणि त्यांनी आज पत्रकार परिषद घेत राजीनामा देत असल्याचे सांगितले. या पत्रकार परिषदेत डॉ. घैसास यांनी रुग्णालयात या प्रकरणात आतापर्यंत काय-काय कारवाई केली आहे, याबाबत डॉ. केळकर यांच्यावतीने माहिती देण्यात आली आहे.
हेही वाचा : Video : ‘नाथाभाऊला का पुरावे मागत असतात?’ एकनाथ खडसेंचा मंत्री गिरीश महाजनांना सवाल, नेमकी बातमी काय?
