चाळीसगाव/जळगाव : सरकारी जागेवर वेल्डिंगचे दुकान सुरू करत अतिक्रमण केल्याने चाळीसगाव तालुक्यातील गणेशपूर येथील लोकनियुक्त सरपंचांना जिल्हाधिकाऱ्यांनी अपात्र ठरविले आहे. चंद्रकांत साहेबराव पाटील असे या अपात्र सरपंचांचे नाव आहे.
चंद्रकांत साहेबराव पाटील हे 2022च्या निवडणुकीत लोकनियुक्त सरपंच म्हणून विजयी झाले होते. दरम्यान, त्यांनी गणेशपूर बसस्थानका समोरच्या चौकात अतिक्रमण करीत त्यांनी वेल्डिंगचे दुकान उभारले आहे, असा आरोप शशिकांत राजेंद्र पाटील व नीलेश युवराज पाटील यांनी केला.
काय होती तक्रार –
चाळीसगाव तालुक्यातील गणेशपूर गावातील बसस्टँड चौकात सार्वजनिक बांधकाम विभागाच्या जागेवर अंदाजे सुमारे 30 बाय 25 फूट यापेक्षा जास्त सरकारी जागेवर बेकायदेशीर अतिक्रमण करुन त्यावर पक्के शेडची उभारणी करुन श्री. गजानन वेल्डिंग वर्कशॉप या नावाने सरकारी जागेवर अतिक्रमण केल्यामुळे ग्रामपंचायत अधिनियम कलम 14 (ज) (3) प्रमाणे सदस्य/सरपंच अपात्र असूनही पदाचा उपभोग घेत असल्याने ग्रामपंचायत सदस्य रद्द करण्यात यावे, आणि कायद्यांतर्गत लोकनियुक्त सरपंच/सदस्यांवर कायदेशीर कार्यवाही करण्याची मागणी करण्यात आली यावी, अशी तक्रार जिल्हाधिकारी आयुष प्रसाद यांच्याकडे करण्यात आली होती.
या तक्रारीनुसार जिल्हाधिकारी आयुष प्रसाद यांनी सुनावणी घेतली. तसेच यामध्ये चाळीसगावच्या गटविकास अधिकाऱ्यांचा अहवाल मागवला होता. या अहवालात चंद्रकांत पाटील यांनी अतिक्रमण केल्याचे नमूद केले, तसेच अतिक्रमण सरकारी जागेवर असल्याचाही दाखला दिला. त्यानंतर जिल्हाधिकाऱ्यांनी सरपंच पाटील यांना महाराष्ट्र ग्रा.पं. अधिनियम 1958 चे कलम 14 ज-3 नुसार अपात्र घोषित केले आहे. दरम्यान, तक्रारदार शशिकांत पाटील व नीलेश पाटील यांचे तर्फे अॅडव्होकेट विश्वासराव भोसले यांनी काम पाहिले.
