पारोळा, 11 ऑगस्ट : जळगाव जिल्ह्यातील भडगाव तालुक्यातील एका चिमुरडीवर लैंगिक अत्याचार करुन तिची हत्या करण्यात आली होती. तसेच एरंडोल तालुक्यातील एका आश्रमशाळेतही काही चिमुरडींवर लैंगिक अत्याचार केल्याची घटना समोर आली होती. या दोन्ही घटनांनी संपूर्ण जिल्हा हादरला आहे.
या दोन्ही गंभीर घटना ताज्या असतानाच मात्र, जळगाव जिल्ह्यातील पारोळा तालुक्यातून आणखी एक अत्यंत धक्कादायक आणि तितकीच संतापजनक घटना समोर आली आहे. पारोळा तालुक्यातील एका अल्पवयीन मुलीवर अत्याचार करून तिला जीवे ठार मारण्याचा संतापजनक प्रकार समोर आला आहे. या घटनेने मोठी खळबळ उडाली आहे.
काय संपूर्ण घटना –
नैसर्गिक विधीसाठी नदीकाठी गेलेल्या अल्पवयीन मुलीवर जबरदस्ती अत्याचार करुन तिच्या डोक्यावर दगडाने वार करत तसेच दोरीने गळा आवळून जीवे ठार मारण्याचा प्रयत्न करण्यात आला. या घटनेत पीडित अल्पवयीन मुलगी जखमी झाली असून तिला उपचारासाठी धुळे येथील शासकीय रुग्णालयात दाखल करण्यात आले आहे. जळगाव जिल्ह्यातील पारोळा तालुक्यातील एका गावात ही घटना घडली असून या घटनेने पुन्हा एकदा जिल्ह्यात खळबळ उडाली आहे.
आरोपीला तत्काळ अटक –
या घटनेनंतर अल्पवयीन मुलीवर अत्याचार करत जीवे ठार मारण्याचा प्रयत्न करणारा संशयित आरोपी बारक्या उर्फ अशोक मंगा भिल याला पोलिसांनी तत्काळ अटक केली आहे. तसेच त्याच्यावर पोक्सो कायद्यांतर्गत गुन्हा दाखल झाला आहे. संबंधित प्रकरणात वरिष्ठ पोलीस अधिकाऱ्यांच्या मार्गदर्शनानुसार पुढील तपास सुरू असल्याची माहिती पोलिसांनी दिली आहे.
पोलीस स्टेशनमध्ये ठिय्या आंदोलन –
दरम्यान, या घटनेनंतर ग्रामस्थांमध्ये एकच संतापाची लाट उसळली. संतप्त ग्रामस्थांनी पारोळा पोलीस ठाण्यात ठिय्या आंदोलन करत आरोपीला तात्काळ अटक करून फाशी देण्याची मागणी केली. मात्र, पोलिसांकडून ग्रामस्थांची समजूत काढण्याचा प्रयत्न सुरू आहे.
