नवी दिल्ली – वीर महादजी शिंदे हे महान स्वाभिमानी मराठा योद्धा होते. त्यांच्या नावे पळपुट्यांना पुरस्कार देणे हा महादजी शिंदे यांचा अपमान आहे, या शब्दात शिवसेना उबाठा गटाचे खासदार संजय राऊत यांनी केंद्रीय मंत्री ज्योतिरादित्य सिंधिया यांना प्रत्युत्तर दिले आहे.
दिल्लीत महाराष्ट्र सदनात अखिल भारतीय साहित्य संमेलनाच्या निमित्ताने ‘महादजी शिंदे राष्ट्र गौरव पुरस्कार’ सोहळ्याचे आयोजन करण्यात आले. यावेळी उपमुख्यमंत्री एकनाथ शिंदे यांना ‘महादजी शिंदे राष्ट्र गौरव पुरस्कार’ प्रदान करण्यात आला. एकनाथ शिंदे यांना हा पुरस्कार माजी केंद्रीयमंत्री तसेच साहित्य संमेलनाचे स्वागताध्यक्ष शरद पवार यांच्या हस्ते प्रदान करण्यात आला.
या पुरस्कारानंतर शिवसेना उबाठा गटाचे खासदार संजय राऊत यांनी शरद पवार यांच्यावर निशाणा साधला. तसेच एकनाथ शिंदे यांच्यावर जोरदार टीका केली होती. माध्यमांच्या प्रश्नांवर संजय राऊत म्हणाले की, तुम्हाला माहिती आहे का कुणी दिला आहे हा पुरस्कार, अशाप्रकारे राजकारण्यांना देण्यात येणारे पुरस्कार हे खरेदी केले जातात किंवा विक्री केले जातात.
काय म्हणाले होते केंद्रीय मंत्री ज्योतिरादित्य सिंधिया –
संजय राऊत यांच्या या टीकेवर केंद्रीय मंत्री ज्योतिरादित्य सिंधिया यांनी संजय राऊत यांच्यावर निशाणा साधत म्हटले होते की, ‘मराठा समाज सर्व काही पाहतोय! बाळासाहेब ठाकरे यांचा आदर्श नाकारून केवळ हिंदुत्वाचाच नव्हे तर मराठ्यांच्या स्वाभिमानाचाही अपमान करून मराठा सन्मान कसा समजणार? ज्यांनी स्वतःच्या समाजात आपला आधार आणि आदर गमावला आहे ते इतरांच्या आदराने त्रस्त आहेत,’ या शब्दात केंद्रीय मंत्री ज्योतिरादित्य सिंधिया यांनी संजय राऊतांना टोला लगावला होता. यावर आता पुन्हा संजय राऊत यांनी केंद्रीय मंत्री ज्योतिरादित्य सिंधिया यांच्यावर निशाणा साधला आहे.
काय म्हणाले संजय राऊत –
‘Great!, महाराज, इतिहास समजून घ्या. वीर महादजी शिंदे हे महान स्वाभिमानी मराठा योद्धा होते. त्यांच्या नावे पळपुट्यांना पुरस्कार देणे हा महादजी शिंदे यांचा अपमान आहे. एकनाथ शिंदे यांना जयाजीराव शिंदे यांच्या नावे पुरस्कार द्यायला काहीच हरकत नाही. महादजी यांनी दिल्ली पुढे लोटांगण घातले नाही!’, या शब्दात सोशल मीडिया प्लॅटफॉर्म ‘एक्स’वर लिहित संजय राऊत यांनी केंद्रीय मंत्री ज्योतिरादित्य सिंधिया यांना प्रत्युत्तर दिले आहे.
