जळगाव : राज्यात गेल्या काही दिवसात अपघातांच्या घटनेमध्ये वाढ झाल्याचे दिसून येत आहे. काल जळगाव जिल्ह्यातील धरणगाव तालुक्यातील दोनगाव गावाजवळ एसटी महामंडळाच्या बसचा भीषण अपघात घडला होता. ही घटना ताजी असतानाच आता आणखी एक धक्कादायक घटना समोर आली आहे.
धरणगाव-चोपडा रस्त्यावर पिंपळे फाट्याजवळ एसटी बसचा भीषण अपघात झाला. तसेच या अपघातात एकाचा जागीच मृत्यू झाल्याची माहिती समोर आली आहे. तसेच या अपघातात बसमध्ये प्रवास करणारे 21 प्रवासीसुद्धा जखमी झाले आहेत. ही घटना आज शनिवारी सकाळच्या सुमारास घडली. या भीषण अपघातातील जखमी बस चालकाची प्रकृती गंभीर जखमी असल्याची माहिती मिळाली आहे.
काय आहे संपूर्ण घटना –
काल शुक्रवारी पहाटे धरणगाव तालुक्यातील दोनगाव येथे शाळकरी विद्यार्थ्यांनी भरलेल्या बसचा भीषण अपघात झाला होता. यामध्ये चालकाचा ताबा सुटल्याने बस थेट इलेक्ट्रिक पोलला धडकली होती. या अपघातात 28 प्रवासी जखमी झाले होते. ही घटना ताजी असतानाच आज दुसऱ्याच दिवशी आणखी एक धक्कादायक घटना घडली.
आज शनिवारी सकाळी सहा वाजेच्या सुमारास धरणगाव चोपडा रोडवरील पिंपळे फाट्याजवळ बस अपघात झाला आहे. सुसाट वेगात असलेल्या बसने रस्त्यावर उभ्या असलेल्या एका ट्रॅक्टरला पाठीमागून धडक दिली. हा अपघात इतका भीषण होता की, एकाचा जागीच मृत्यू झाला. तसेच एसटी बस ड्रायव्हरची केबिन पूर्णपणे चक्काचूर झाली. तसेच या अपघातात 21 प्रवासी जखमी झाल्याची प्राथमिक माहिती समोर आली आहे.
कामराज सोनवणे असे या अपघातात मृत झालेल्या व्यक्तीचे नाव आहे. कामराज सोनवणे चोपडा शहरातील प्रताप प्राथमिक विद्यालयात शिक्षक होते, अशी माहिती मिळाली आहे. दरम्यान, या अपघातात एसटीचा ड्रायव्हर गंभीर जखमी असल्याची माहिती समोर येत आहे. घटनेची माहिती मिळताच पोलीस निरीक्षक पवन देसले आपल्या कर्मचाऱ्यांसह घटनास्थळी दाखल झाले. तसेच वाहतूक सेवा सुरळीत करण्यात आली. तर सर्व जखमींवर धरणगाव ग्रामीण रुग्णालयात उपचार सुरू आहेत.
