जळगाव, 6 मे : मुंबईच्या प्रादेशिक हवामानशास्त्र केंद्राने जळगाव जिल्ह्यासाठी “रेड अलर्ट” जारी केला आहे. तसेच काही भागांत ताशी 50-60 किमी वेगाने वादळी वारे वाहण्याची तसेच विजांच्या कडकडाटासह पावसाची शक्यता वर्तवण्यात आली आहे.
दरम्यान, वादळी वाऱ्यासह पावसाचा अलर्टच्या पार्श्वभूमीवर बचाव यंत्रणा सतर्क ठेवण्यात आल्या असून नागरिकांनी घराबाहेर जाणे टाळावे व प्रशासनाने जाहीर केलेल्या सूचनांचे काटेकोर पालन करावे. पालकमंत्री गुलाबराव पाटील यांनी “प्रशासन सज्ज आहे, मात्र नागरिकांनीही जबाबदारीने वागून आपली काळजी घ्यावी,” असे आवाहन केले आहे.
जळगाव जिल्ह्यात अवकाळी पावसाची हजेरी –
जळगावसह नंदुरबार, धुळे, व नाशिक जिल्ह्यांत आज विजांच्या कडकडाटासह मेघगर्जनेस अवकाळी पावसाची अंदाज व्यक्त करण्यात आला असताना आज जळगाव शहरासह जिल्ह्यातील विविध भागात वादळी वाऱ्यासह अवकाळी पावसाने हजेरी लावलीय. काही भागात दुपारी 2 वाजेच्या सुमारास तर काही भागात सायंकाळी अवकाळी पावसाने हजेरी लावलीय.
पालकमंत्र्यांनी दिल्या पंचनामा करण्याच्या सूचना –
दरम्यान, जळगाव जिल्ह्यात आज दुपारनंतर झालेल्या अवकाळी पावसामुळे तसेच गारा पडल्याने काही तालुक्यांमध्ये शेती पिकांचे, घरांचे व जनावरांचे नुकसान झाल्याच्या प्राथमिक तक्रारी प्राप्त झाल्या आहेत. या पार्श्वभूमीवर कोणतीही विलंब न करता नुकसानग्रस्त भागांतील पंचनामे तातडीने पूर्ण करावेत, असे निर्देश पालकमंत्री गुलाबराव पाटील यांनी जिल्हा प्रशासनाला दिले आहेत.
काही भागांमध्ये रस्त्यांवर झाडे व वीज तारा पडल्याच्या तक्रारी असून, अशा ठिकाणी तातडीने झाडे हटवून रस्ते मोकळे करावेत तसेच वीज तारा दुरुस्त करून खंडित वीजपुरवठा सुरळीत करावा, अशा सूचनाही त्यांनी दिल्या.
