नाशिक, 25 जानेवारी : राज्यभरात गुन्हेगारीच्या घटनांमध्ये वाढ होत असताना नाशिकमधून धक्कादायक घटना समोर आली आहे. नाशिकमध्ये मंगळवारी (23 जानेवारी) रासबिहारी लिंक रोड येथे एका 19 वर्षीय तरुणीचा मृतदेह आढळून आल्याने खळबळ उडाली होती. दरम्यान, या प्रकरणात पोलिसांनी तरुणीच्या प्रियकरास अटक केली आहे.
काय आहे संपूर्ण बातमी? –
मिळालेल्या माहितीनुसार, नर्सिंग कॉलेजमध्ये शिकत असलेल्या प्रियंका वीरजी वसावे (19, रा. ता. अक्कलकुवा, जि. नंदुरबार) तरूणीचा मृतदेह रासबिहारी लिंकरोडवरील एका मोकळ्या जागेत मंगळवारी आढळून आला होता. दरम्यान, पंचवटी पोलिसांनी घटनास्थळी पंचनामा करत तरूणीच्या मृतदेहाला शवविच्छेदनासाठी जिल्हा शासकीय रुग्णालयात पाठवले होते. याप्रकरणी पोलिसांनी या घटनेचा तपास सुरु केला होता.
चॅटिंग करीत असल्याचा आला संशय –
मृत तरूणी छत्रपती संभाजीनगर नाक्यावरील एका परिचारिका महाविद्यालयात परिचारिकेचे शिक्षण घेत होती. ती मुलगी आणि याप्रकरणातील आरोपी सागर तडवी यांची जुनी मैत्री होती. या मैत्रीचे रुपांतर प्रेमात झाले अन् तरूणी अंबड येथे राहत असलेल्या सागरच्या घरी गेली. दरम्यान, रात्री एक ते दीडच्या सुमारास ती दुसऱ्या कोणाशी मोबाईल फोनवर चॅटिंग करीत असल्याचा संशय सागरला आला आणि याच कारणावरून दोघांमध्ये भांडण झाले.
प्रियंका वीरजी वसावे (19, रा. ता. अक्कलकुवा, जि. नंदुरबार)
प्रेयसीचा आवळला गळा –
दरम्यान, प्रेयसी फोनवर चॅटिंग करीत असल्याचा संशय आल्याने संतप्त प्रियकराने तिचा ओढणीच्या सहाय्याने गळा आवळून हत्या केली. दरम्यान, प्रियसीची हत्या केल्यानंतर प्रियकराने त्याच्या मित्राच्या मदतीने मृतदेह अंबड येथून चारचाकीतून रासबिहारी लिंकरोड येथील मोकळ्या जागेत आणून टाकला होता.
आरोपीला पोलिसांनी केली अटक –
पंचवटी पोलीस ठाण्यात याप्रकरणी खुनाचा गुन्हा दाखल करण्यात आला आहे. पोलिसांनी संशयित प्रियकरास शिताफीने बेड्या ठोकल्या असून सागर तडवी (21, मूळ रा. नंदुरबार, हल्ली राहणार, माऊलीनगर, अंबड, नाशिक) असे संशयित प्रियकराचे नाव आहे.
पोलीस आयुक्त संदीप कर्णिक, परिमंडळ एकचे पोलीस उपायुक्त किरणकुमार चव्हाण, पंचवटी विभागाचे सहाय्यक पोलीस आयुक्त नितीन जाधव, पंचवटी पोलीस ठाण्याचे वरिष्ठ पोलीस निरीक्षक माछरे यांच्या मार्गदर्शनाखाली गुन्हेशोध पथकाचे सपोनि मिथुन परदेशी, रोहित केदार, हवालदार सागर कुलकर्णी, राजेश सोळसे, अनिल गुंबाडे, दीपक नाईक, कैलास शिंदे, पोलीस नाईक नीलेश भोईर, संदीप मालसाने, घनश्‍याम महाले, वैभव परदेशी, नितीन पवार, गोरख साबळे, श्रीकांत साळवे यांनी संयुक्तिकरीत्या केली.
