ईसा तडवी, प्रतिनिधी
पाचोरा, 3 फेब्रुवारी : पाचोरा शहरातील बसस्थानकातून मंगळसुत्र चोरी केल्याची बातमी समोर आली आहे. बसमध्ये चढत असताना प्रवासी महिलेच्या गळ्यातील मंगळसूत्र अज्ञात चोरट्याने लांबविल्याची घटना पाचोरा बसस्थानक शुक्रवारी 3 फेब्रुवारी रोजी दुपारी घडली.
काय आहे संपूर्ण बातमी? –
मिळालेल्या माहितीनुसार, वैष्णवी ज्ञानेश्वर जाधव (वय 23, अयोध्या नगर, मालेगाव) ही महिला पाचोरा येथील तिच्या मामेसासऱ्यांकडे आली होती. दरम्यान, ही महिला परतीच्या प्रवासासाठी पाचोरा बसस्थानकात आली आणि पाचोरा-जळगाव बसमध्ये चढत असताना अज्ञात चोरट्याने महिलेच्या गळ्यातील सात ग्रॅम सोन्याचे मंगळसूत्र लांबवले.
अज्ञात चोरट्याविरूद्ध गुन्हा दाखल –
दरम्यान, ही बाब महिलेच्या लक्षात येताच बसचालकाने बस पाचोरा पोलिसात तपासणीसाठी आणली. पाचोरा पोलिसांनी संपूर्ण बसमधील प्रवाशांची झाडाझडती घेत सखोल तपास केला. मात्र, बसमधील प्रवाशांकडे संबंधित महिलेचे मंगळसूत्र आढळून आले नाही. महिलेच्या फिर्यादीवरून पाचोरा पोलिस स्टेशनमध्ये अज्ञात चोरट्याविरूद्ध गुन्हा दाखल करण्यात आला आहे.
हेही वाचा : पाचोरा पोलीस स्टेशन येथे सहायक पोलीस निरीक्षकपदी धरमसिंग सुंदरडे
