ईसा तडवी, प्रतिनिधी
शेवाळे, ता. पाचोरा : जागतिक आदिवासी दिनानिमित्त शेवाळे येथे नुकतेच विविध कार्यक्रमांचे आयोजन करून हा दिवस उत्साहात आणि जल्लोषपूर्ण वातावरणात साजरा करण्यात आला. यानिमित्त गावातून भव्य आदिवासी मिरवणूक काढण्यात आली. या मिरवणुकीत परिसरातील आदिवासी बांधव, महिला, युवक तसेच नागरिकांनी मोठ्या संख्येने सहभागी होत उत्स्फूर्त प्रतिसाद दिला.
मिरवणुकीदरम्यान पारंपरिक वेशभूषा, घोषणाबाजी आणि विविध सामाजिक संदेशांच्या माध्यमातून आदिवासी समाजाची समृद्ध संस्कृती, परंपरा आणि एकतेचे दर्शन घडविण्यात आले. तसेच जल, जंगल आणि जमीन यासह शिक्षण, रोजगार, आरक्षण व संविधानिक अधिकारांबाबत जनजागृती करण्यात आली.
जागतिक आदिवासी दिवस हा केवळ उत्सव साजरा करण्याचा दिवस नसून आदिवासी समाजाच्या हक्कांच्या संरक्षणाचा आणि सामाजिक प्रगतीचा संकल्प करण्याचा दिवस असल्याचे यावेळी सांगण्यात आले. समाजातील प्रत्येक घटकाने शिक्षण, संघटन आणि जागरूकतेच्या माध्यमातून आपल्या हक्कांसाठी सजग राहण्याचे आवाहन करण्यात आले.
कार्यक्रमाच्या यशस्वी आयोजनासाठी परिश्रम घेणारे आयोजक, कार्यकर्ते, महिला, युवक तसेच प्रत्यक्ष-अप्रत्यक्ष सहकार्य करणाऱ्या सर्व समाजबांधवांचे यावेळी आभार मानण्यात आले.
