छत्रपती संभाजीनगर, 29 मार्च : राज्यात दिवसेंदिवस गुन्हेगारीच्या घटनांमध्ये वाढ होत असताना तरूणाची निर्घृणपणे हत्या केल्याची धक्कादायक बातमी समोर आली आहे. बहिणीच्या लव्ह मॅरेजला (प्रेम विवाह) मदत केली म्हणून येथे भावाने 24 वर्षाच्या तरुणाची निर्घृण हत्या केल्याची घटना छत्रपती संभाजीनगरात घडली. पवन शिवराम लोढे (वय, 24 वर्षे) असे मृत तरुणाचे नाव आहे.
नेमकं काय घडलं? –
मिळालेल्या माहितीनुसार, मृत पवन हा शेतकरी असून त्याच्या मामाचा मुलगा विशाल लक्ष्मण नवले याने संशयित आरोपी विशाल वाघचौरे, सचिन वाघचौरे यांच्या बहिणीशी पळून जावून विवाह केला होता. त्यांच्या विवाहाला पवनने मदत केली होती. याचाच राग मनात धरून संशयित आरोपींनी संभाजीनगरातील शेंदूरवादा- सावखेडा महामार्गावर बोलेरोने पवनच्या दुचाकीला जोरदार धडक दिली. यामध्ये पवन गंभीर जखमी झाला होता. त्यानंतर पवनचा उपचारादरम्यान मृत्यू झाला.
पुढील आठवड्यात होते लग्न –
विशेष म्हणजे हत्या झालेल्या तरुणाचे पुढील आठवड्यात लग्न होते. घरात लग्नाच्या पार्श्वभूमीवर तयारी सुरू असल्याने घरात चैतन्याचे वातावरण निर्माण झाले होते. दरम्यान, ज्याच्या लग्नाची घरात तयारी सुरू असतानाच त्याच्याच मृत्यूची बातमी आल्याने मृत तरुणाचे कुटंबीय टाहो फोडत आहेत. दरम्यान, याप्रकरणी वाळुज पोलीस ठाण्यात गुन्ह्यांची नोंद करण्यात आली असून पोलीसांकडून अधिक तपास सुरू आहे.
हेही वाचा : लोकसभा निवडणुकीसाठी पक्षाने उमेदवारी नाकारली अन् नैराश्येतून खासदाराने उचलले टोकाचे पाऊल
