भुसावळ : जळगाव जिल्ह्यातील भुसावळ येथून एक धक्कादायक घटना समोर आली आहे. भुसावळ रेल्वे स्टेशनवर पोलिसांना पैशांनी भरलेली बॅग सापडली. मात्र, पोलिसांनी बॅगेत ठेवलेल्या नोटांची तपासणी केली असता पोलिसांना मोठा धक्का बसला. रेल्वे स्टेशनवरील बॅगमध्ये आढळलेल्या या 1 कोटींच्या नकली नोटा होत्या. या प्रकरणी एका संशयिताला ताब्यात घेण्यात आले आहे.
भुसावळ रेल्वे स्थानकावर दोन जणांच्या संशयास्पद हालचाली पाहून पोलिसांना संशय आला. यानंतर पोलिसांनी आरोपीची बॅग तपासली असता बॅगेत नोटा आढळून आल्या. या प्रकरणी पोलिसांनी एका व्यक्तीला घटनास्थळी अटक केली. मात्र, दुसरा संशयित पळून जाण्यात यशस्वी झाला. याप्रकरणी पोलिसांनी गुन्हा दाखल केला असून पुढील तपास सुरू आहे. सीसीटीव्ही कॅमेऱ्यांच्या आधारे फरार आरोपीचा शोध सुरू आहे.
नेमकं काय घडलं –
मिळालेल्या माहितीनुसार, भुसावळ रेल्वे स्थानकावर दोघे जण संशयास्पद स्थितीत फिरत होते. यावेळी पोलिसांना त्याच्यावर संशय आला. त्यामुळे त्यांनी आरोपीची बॅग तपासली. त्यानंतर त्याच्या बॅगेतून सुमारे एक कोटी रुपयांच्या बनावट नोटा जप्त करण्यात आल्या. हे दोघेही मलकापूरहून भुसावळला आले होते.
पोलिसांना संशय होताच एका आरोपीने घटनास्थळावरुन पळ काढला. तर दुसऱ्या एका आरोपीला रेल्वे पोलिसांनी अटक केली आहे. यामध्ये 500 रुपयांच्या नोटांच्या बंडलमध्ये वरची एकच नोट खरी होती., तर उरलेल्या बंडलवर चिल्ड्रन्स बँक लिहिलेल्या बनावट नोटा होत्या. याप्रकरणी ताब्यात घेण्यात आलेल्या संशयिताची रेल्वे सुरक्षा दल आणि रेल्वे पोलीस कसून चौकशी करत आहेत.
आरोपींनी या नोटा का आणल्या? त्या कशासाठी वापरल्या जाणार होत्या? आरोपींनी यापूर्वी अशा प्रकारे बनावट नोटांची तस्करी केली होती का?, पोलीस त्याचा तपास करत आहेत. तर दुसरीकडे अशाप्रकारे रेल्वेतून बनावट नोटांची तस्करी होत असल्याने रेल्वे पोलीस प्रशासनही सतर्क झाले आहे.
