बीड, 19 एप्रिल : बीड जिल्ह्याचे पोलीस दल देखील विविध घडमोडींमुळे चर्चेत आले असताना मोठी बातमी समोर आली आहे. बीड जिल्हा पोलीस दलातील निलंबित असलेला पोलीस अधिकारी रणजीत कासले याने सोशल मीडियावर व्हिडिओ करत गंभीर आरोप केले होते. तसेच त्याच्यावर अ‍ॅट्रॉसिटीचा देखील गुन्हा दाखल करण्यात आला होता. दरम्यान, त्याला काल बीड पोलिसांनी पुण्यातून अटक केली. तर दुसरीकडे त्याला पोलीस सेवेतूनच बडतर्फ करण्यात आल्याची माहिती समोर आली आहे.
रणजित कासलेने केले होते गंभीर आरोप –
रणजित कासलेला निलंबित करण्यात आल्यानंतर त्याने सोशल मीडियावरून व्हिडिओ व्हायरल करत गंभीर आरोप केले होते. यापैकीच एक आरोप म्हणजे वाल्मिक कराच्या एन्काऊंटरच्या ऑफरचा. वाल्मिक कराच्या एन्काऊंटरसाठी मला ऑफर देण्यात आली होती. यासाठी बंद दाराआड चर्चेला देखील मला बोलवण्यात आले होते. मात्र, मी त्यावेळी नकार दिला असल्याचे रणजित कासलेने सांगितलं होतं. यासोबतच धनंजय मुंडे यांच्या माणसांकडून मला मॅनेज करण्यासाठी निवडणुकीच्या काळात माझ्या बँक खात्यात 10 लाख रूपये देण्यात आल्याचा गौप्यस्फोटही त्याने परवा 17 एप्रिल रोजी पुण्यात केला होता. यासोबत धनंजय मुंडे यांनी इतरही अधिकाऱ्यांना पैसे देण्यात आल्याचा आरोप कासलेने केला होता.
बीड पोलिसांनी केली अटक –
रणजित कासलेवर एका प्रकरणासंदर्भात निलंबनाची कारवाई करण्यात आली होती. असे असताना लातूरमध्ये अमित देशमुख हे अकार्यक्षम नेतृत्व असून त्यांच्याविरोधात कुत्र जरी उभं केलं तरी ते निवडून येऊ शकतं, असं वक्तव्य गेल्या एक महिन्यांपुर्वी रणजित कासलेने केले होते. यावरून त्याच्याविरोधात वकिलाच्या तक्रारीवरून अ‍ॅट्रॉसिटीचा गुन्हा दाखल करण्यात आला होता. यासाठी बीड पोलिसांकडून त्याचा शोध घेतला जात होता. मात्र, त्याने पोलिसांना शरण येणार असल्याचेही सांगितले होते. अशातच त्याला काल 18 एप्रिल रोजी पुण्यातून बीड पोलिसांनी अटक केली. दरम्यान, त्याला कालच बीडमध्ये आणत न्यायालयात हजर केले असता त्याला पोलीस कोठडी सुनावण्यात आली आहे.
आधी निलंबन अन् आता केलं बडतर्फ –
रणजीत कासले हा सायबर पोलिसात कार्यरत असताना विनापरवानगी आरोपीला घेऊन गुजरातमध्ये गेला होता. तेथे त्याने पैसे घेतल्याचा आरोप झाल्याने 26 मार्च रोजी त्याला निलंबित केले होते. यानंतर सोशल मीडियावर व्हिडिओ बनवत पोलीस अधिकारी तसेच राजकीय नेत्यांवर गंभीर स्वरूपाचे आरोप करत होता. निलंबनानंतरही गाडीत टोपी ठेवत इतरांवर दबाव टाकण्याचा प्रयत्न करत होता. असे असताना त्याला बीड पोलिसांकडून 19 एप्रिल रोजी पुण्यातून अटक करण्यात आली. मात्र, त्याआधीच गुरूवारी रात्री छत्रपती संभाजीनगरचे विशेष पोलीस महानिरीक्षक विरेंद्र मिश्र यांनी रणजित कासले याला पोलीस खात्यातून बडतर्फ केले. याबाबतची माहिती अप्पर पोलीस अधीक्षक सचिन पांडकर यांनी दिलीय.
