ईसा तडवी, प्रतिनिधी
पाचोरा, 14 जून : पाचोरा तालुक्यातील खेडगाव नंदीचे येथील शेतकऱ्यावर काळाने झडप घातली असून वीज पडून त्या शेतकऱ्याचा मृत्यू झालाय. मोहित जगतसिंग पाटील (वय 25 वर्ष) असे त्या अविवाहित शेतकऱ्याचे नाव असून आज दुपारी साडे तीन वाजेच्या सुमारास अंगावर वीज पडल्याने त्या शेतकऱ्याचा मृत्यू झालाय.
नेमकं काय घडलं? –
मिळालेल्या माहितीनुसार, मोहित जगतसिंग पाटील हे त्यांच्या कुटुंबियांसह शेतात गेले होते. आज दिवसभर त्यांच्या शेतात मका पेरणीचे काम सुरू होते. दरम्यान, आज दुपारी साडे तीन वाजेच्या सुमारास आई, काका तसेच काकू यांच्यासह मोहित पाटील पेरणीचे काम करत होते. यावेळी वीजेचा कडकडाट झाला आणि त्यांच्या अंगावर वीज पडली. यामध्ये ते जागीच कोसळले. यानंतर त्यांना पाचोरा ग्रामीण रूग्णालयात नेण्यात आले असता डॉक्टरांनी मृत घोषित केले. याप्रकरणी पाचोरा पोलीस स्टेशनमध्ये अकस्मात मृत्यूची नोंद करण्यात आली आहे.
एकुलत्या एक मुलाच्या मृत्यूने आईसह कुटुंबियांचा आक्रोश –
मोहित पाटील हा त्यांच्या कुटुंबातील एकमेव मुलगा होता. त्याच्या पश्चात बहिण तसेच आई, वडील असा परिवार आहे. दरम्यान, मोहित पाटील हा तरूण शेतकरी शेतीव्यवसाय तसेच दुग्धपालनाच्या माध्यमातून उदरनिर्वाह करत कुटुंबियांसाठी आधार होता. ऐन उमेदीच्या वयात एकुलत्या एका मुलाचा वीज पडून दुर्दैवी मृत्यू झाल्याने आईसह कुटुंबियांनी एकच आक्रोश केला. दरम्यान, मोहित पाटील या तरूण शेतकऱ्याच्या मृत्यूने परिसरात हळहळ व्यक्त केली जात असून त्यांच्यावर आज रात्री 9 वाजता अंत्यसंस्कार केले जाणार असल्याचे माहिती प्राप्त झालीय.
पाचोरा तालुक्यात वादळी पावसामुळे नुकसान –
पाचोरा तालुक्यात गेल्या दोन-तीन दिवसांत झालेल्या वादळी पावसामुळे मोठ्या प्रमाणात नुकसान झालंय. याबाबत प्रशासनातील अधिकाऱ्यांकडून तात्काळ पंचानामे देखील केले जात आहेत. तसेच पंचानाम्याच्या अहवाल शासनाकडे प्राप्त झाल्यानंतर शेतकऱ्यांना मदत मिळवून देण्यासाठी पाठपुरावा करणार असल्याचे लोकप्रतिनिधींकडून सांगितले जात आहे.
