ईसा तडवी, प्रतिनिधी
पाचोरा, 21 जून : जळगाव जिल्ह्यातील पाचोरा तालुक्यातील लासगाव येथून दुःखद बातमी समोर आली आहे. लासगावात 13 वर्षीय बालिकेचा सर्पदंशाने मृत्यू झालाय. यास्मीन बाबू शेख असे मयत मुलीचे नाव आहे. घराच्या मागच्या बाजूस असताना आज 21 जून रोजी सकाळी साडे नऊ वाजेच्या सुमारास सर्पदंश झाल्याने तिचा मृत्यू झालाय.
नेमकं काय घडलं? –
मिळालेल्या माहितीनुसार, बाबू आजम शेख हे लासगावचे रहिवासी असून त्यांची मुलगी यास्मीन ही आज सकाळी साडे नऊ वाजेच्या सुमारास घराच्या मागच्या बाजूने भांडे धूत होती. अशातच सापाने यास्मिनला दंश मारला. सर्पदंशानंतर यास्मिनला तातडीने नांद्रा येथील प्राथमिक आरोग्य केंद्रात प्रथमोपचारासाठी नेण्यात आलं.
पण, प्रकृती गंभीर असल्याने तिला तत्काळ जळगाव जिल्हा रुग्णालयात हलवण्याचा प्रयत्न करण्यात आला. मात्र, वाटेतच तिची प्राणज्योत मालवली. दरम्यान, 13 वर्षीय बालिकेचा अचानकपणे सर्पदंशामुळे मृत्यू झाल्याच्या घटनेमुळे लासगावसह परिसरात हळहळ व्यक्त केली जात आहे.
सर्पमित्राने पकडले सापाला –
यास्मिनला दंश करणाऱ्या सापाला सर्पमित्राने पकडलंय. पकडलेला सर्प हा विषारी जातीचा असल्याची प्राथमिक माहिती मिळत आहे. सर्पदंशाच्या घटनेनंतर काही तासांतच स्थानिक सर्पमित्र घटनास्थळी पोहोचले आणि संबंधित सापाला जिवंत पकडले. दरम्यान, सर्प पकडल्यानंतर परिसरात थोडासा दिलासा मिळाला असला, तरीही बालिकेच्या मृत्यूमुळे शोककळा पसरली आहे.
