जळगाव, 6 सप्टेंबर : स्थानिक गुन्हे शाखेचे तत्कालीन पोलिस निरीक्षक संदीप पाटील यांच्यावर लग्नाचे अमिष दाखवून महिलेवर अत्याचार केल्याचा आरोप आहे. अखेर त्यांना निलंबित करण्यात आले आहे. याबाबतचे आदेश नाशिक परिक्षेत्राचे विशेष पोलिस महानिरीक्षक (Special Inspector General of Police) दत्तात्रय कराळे यांनी काल शुक्रवारी काढले.
काय आहे प्रकरण –
29 ऑगस्ट रोजी जिल्हा नियोजन समितिची बैठक आयोजन करण्यात आली होती. या बैठकीत चाळीसगावचे आमदार मंगेश चव्हाण यांनी पोलीस निरीक्षक संदीप पाटील यांनी महिलेवर अत्याचार केल्याचा आरोप केला होता.
दरम्यान, या प्रकरणात फिर्याद देण्यासाठी आलेली महिला आपण नंतर येऊ असे सांगून परत गेल्याने गुन्हा दाखल होऊ शकला नाही. तर दुसरीकडे मात्र या विषयी नैतिकतेला सोडून कृत्य केल्याचा अहवाल जिल्हा पोलिस अधीक्षक डॉ. महेश्वर रेड्डी यांनी विशेष पोलीस महानिरीक्षक दत्तात्रय कराळे यांच्याकडे पाठविला होता.
या अहवालानंतर आता संदीप पाटील यांना निलंबित करण्यात आले. काल शुक्रवारी याबाबतचे आदेश काढण्यात आले. यानंतर अपर पोलिस अधीक्षक अशोक नखाते यांच्यामार्फत आता संदीप पाटील यांची खातेअंतर्गत प्राथमिक चौकशी करण्यात येणार आहे.
