मुंबई, 4 नोव्हेंबर : मुख्यमंत्री माझी लाडकी बहिण योजनेचा ऑक्टोबर महिन्याच्या हप्त्याबाबत महत्वाची अपडेट समोर आली आहे. लाडकी बहिण योजनाच्या ऑक्टोबर महिन्याचा हप्त्याबाबत महिला व बालविकास मंत्री अदिती तटकरे यांनी माहिती दिली असून योजनेसाठी आजपासून पात्र लाभार्थी महिल्यांच्या खात्यात 1500 रूपये जमा होणार आहेत. दरम्यान, 18 नोव्हेंपर्यंत योजनेच्या लाभार्थी महिलांनी ई-केवायसी पूर्ण करावी, असे आवाहनही मंत्री अदिती तटकरे यांनी केले आहे.
ऑक्टोबर महिन्याचा हप्ता आजपासून खात्यात जमा होणार –
महिला व बालविकास मंत्री आदिती तटकरे यांनी ऑक्टोबर महिन्याचा हप्ता जारी करण्यासंदर्भात एक्स या प्लॅटफॉर्मवर पोस्टवर माहिती दिली आहे. मुख्यमंत्री माझी लाडकी बहीण योजनेच्या सर्व पात्र लाभार्थ्यांना ऑक्टोबर महिन्याचा सन्मान निधी वितरित करण्याच्या प्रक्रियेस उद्या पासून सुरुवात होत आहे. लवकरच योजनेतील सर्व पात्र लाभार्थ्यांच्या आधार संलग्नित बँक खात्यात सन्मान निधी वितरित होणार आहे, असे त्यांनी एक्स या प्लॅटफॉर्मवर म्हटलंय.
ई-केवायसी पुर्ण करण्याचे करण्याचे आवाहन –
मंत्री अदिती तटकरे पुढे सांगितले की, महाराष्ट्रातील माता-भगिनींच्या अखंड विश्वासाने सुरू असलेली सक्षमीकरणाची ही क्रांती यशस्वीरित्या मार्गक्रमण करत आहे. ही वाटचाल अशीच अखंडपणे सुरू ठेवण्यासाठी मागील महिन्यापासून https://ladakibahin.maharashtra.gov.in या संकेतस्थळावर E-KYC सुविधा उपलब्ध करून देण्यात आली आहे. दरम्यान, सर्व लाडक्या बहिणींनी 18 नोव्हेंबरच्या आधी E-KYC प्रक्रिया पूर्ण करावी ही नम्र विनंती, असे आवाहन आदिती तटकरे यांनी केले आहे.
ई-केवायसी 18 नोव्हेंबर पर्यंत पुर्ण करावी लागणार –
मुख्यमंत्री माझी लाडकी बहीण योजनेच्या सर्व लाभार्थी महिलांसाठी ई-केवायसी करणे आवश्यक करण्यात आले आहे. राज्य सरकारचा मुख्यमंत्री माझी लाडकी बहीण योजनेचा लाभ पात्र लाभार्थी महिलांपर्यंत पोहोचवण्याचा असून त्यासाठी विविध मार्ग अवलंबल्यानंतर ई केवायसी सुरु करण्यात आली आहे. ई केवायसी करत असताना महिलांना त्यांचा आधार क्रमांक आणि वडिलांचा किंवा पतीचा आधार क्रमांक द्यावा लागतो आणि आता योजनेचा लाभ मिळवण्यासाठी ही केवायसी 18 नोव्हेंबरपर्यंत पूर्ण करावी लागणार आहे.
