जळगाव, 18 फेब्रुवारी : जळगाव पोलिसांच्या शहर वाहतूक शाखेकडून राबविण्यात आलेल्या ‘रस्ता सुरक्षा अभियान–2026’चा समारोप मंगळवार 17 फेब्रुवारी सायंकाळी 5.30 वाजता बक्षीस वितरण समारंभाने करण्यात आला. महिनाभर चाललेल्या या जनजागृती मोहिमेत शहरातील 35 शाळांचा सहभाग नोंदविला गेला असून एकूण 173 विद्यार्थी आणि 30 शिक्षकांचा गौरव करण्यात आला.
रस्ता सुरक्षेबाबत जनजागृती –
महिनाभर शहरात विविध उपक्रमांच्या माध्यमातून रस्ता सुरक्षेबाबत जनजागृती करण्यात आली. शाळांमध्ये चित्रकला व निबंध स्पर्धांचे आयोजन करण्यात आले. तसेच ईव्हीएस बस येथे कार्यशाळा घेऊन कंपन्यांमध्येही वाहतूक नियमांविषयी प्रबोधन करण्यात आले. शहरातील प्रमुख चौक, बसस्थानक, रेल्वे स्टेशन, महाविद्यालये व शाळांबाहेर वाहतूक नियमांची माहिती देण्यात आली. रिक्षांवर व दर्शनी भागांवर जनजागृतीपर बॅनर्स लावण्यात आले.
याशिवाय जळगाव जिल्हा पोलीस दलामार्फत हेल्मेट रॅली काढण्यात आली. तसेच आर.एस.पी. शाळेच्या विद्यार्थ्यांनी जनजागृती रॅली काढून नागरिकांना वाहतूक नियमांचे पालन करण्याचे आवाहन केले.
याप्रसंगी जळगावच्या महापौर दीपमाला काळे, उपमहापौर मनोज चौधरी प्रमुख पाहुणे म्हणून उपस्थित होते. तसेच जिल्हा पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गनापुरे आणि पोलीस उपअधीक्षक (गृह) अरुण अव्हाड उपस्थित होते.
रस्ता सुरक्षेचा संदेश –
कार्यक्रमात श्रीराम माध्यमिक स्कूल, शिक्षण मंदिर संस्थेची अभिनव पाठशाळा आणि एम.जे. कॉलेज एनसीसीच्या विद्यार्थ्यांनी पथनाट्य सादर करून रस्ता सुरक्षेचा संदेश दिला. त्यांच्या सादरीकरणालाही बक्षिसे देऊन गौरविण्यात आले.
या संपूर्ण अभियानात शहरातील विविध संस्था व उद्योजकांनी उत्स्फूर्त सहभाग नोंदविला. शहर वाहतूक शाखेच्या या उपक्रमामुळे नागरिकांमध्ये वाहतूक नियमांबाबत जागरूकता वाढण्यास मदत झाल्याचे मत मान्यवरांनी व्यक्त केले.
